فلوٹنگ ریسٹورنٹ سرہند

وَل ’’دوراہا‘‘ آیا ۔ ݙو وڄے ݙوپہراں کوں اَساں ’’کھنّہ ‘‘پُڄ ڳیوسے۔ ایہ سڑک دے کنارے اُتّے ہک شہر ہے ۔ اِتھّوں ہک رستہ سڄے ہتھ کن پُراݨی مسلمان ریاست ’’مالیر کوٹلہ‘‘ کوں ویندے ۔ تھولے اڳوں 2:20اُتے’’ فوسٹر فلوٹنگ ریسٹورنٹ سرہند ‘‘پُڄ ڳیوسے۔ سرہند پنجاب اِچ واقع ہے ۔ اِتّھوں ہک نہر گزردی پئی ہئی ۔ جیندا پاݨی شیشے وانگ سفید ہا ۔ ایندے اُتّے ہک ’’تردا ہوٹل‘‘ بݨایا ڳئے ۔ ہوٹل لوہے دے ڈرمّاں نال ٻدّھا ہوئے ۔ ہک ’’ترٹے‘‘ اُتّے (مچان اُتّے) قائم ہے ۔ کنارے نال ٻدھی آ ونڄ دی پُل نال جھلیّا کھڑے ۔ تہوں ایکوں فلوٹنگ ریسٹورنٹ آہدن ۔ اِتھّاں لہہ کے پہلے اَساں قدرتی حاجت پوری کیتی وَل ڈھڈھ بھرݨ دا پروگرام بݨایا ۔ سویل دا ناشتہ ڈبل روٹی نال کیتا ہا تہوں کہڑیلے دا اُݙ پُݙ ڳیا ہا ۔ بُکھ لڳی کھڑی ہئی ۔ سبزیاں ‘ اُٻلے چاول‘ سلاد اَتے پرچ جیݙی گول ٹِکڑی جیہیں روٹی ساݙی تانگھ اِچ ہئی ۔ میں ترے روٹیاں چاتیاں ‘ سبزی پاتی تے سلاد رکھ کے ہک پاسے کُرسی تے ونڄ ٻیٹھم۔ لنچ مزیدار ہا ۔ فرید پیرزادہ میݙے کیتے سیون اپ دی بوتل گھن آئے ۔ اِتھّاں بوتلاں وچ300م ۔ل پاݨی ہوندے ۔ پیندیں مزا آ ویندے ۔ پتہ لڳا جو پِچھوں سٹاک اِچ روٹی؍ چپاتی مُک ڳئی ہے ۔ میں ہک چپاتی اَپݨے ہک سنگتی کوں ݙے ݙتی اَتے ݙو چپاتیاں نال کم چلایا۔ ایہ ݙو روٹیاں ساݙے پاسے دی ہک روٹی دے برابر ہَن ۔ ہندوستان وچ روٹی دا سائز نِکڑا ہے ‘ ساکوں دِلّی دے مسلمان علاقیاں توں علاوہ کتھائیں وی وݙی روٹی نھیں ملّی۔ آگرہ ‘ اجمیر ہر جاء ایہا ٹِکڑی روٹی ہئی اَتے ہئی وی کتھائیں پنج کتھائیں چھی روپیاں دی۔ اَتے ساکوں پاکستانی ݙہ روپیاں دے بدلے ہندوستان 5:60روپے ملدے ہن۔ ایں سمجھو جو ایہ نکڑی روٹی ساݙے ݙہ روپیاں دے برابر ہئی اَتے ݙو روٹیاں ساݙے وِیہ روپیاں دیاں ہَن۔

بر حال کھاݨاں اچھاہا ‘ میں اُٻلے ہوئے چاول وی کھادے سزی نال ملاکے‘ مزیدار ہَن ۔ بعضیاں کھاݨاں کھا کے چاہ پیتی ۔ اَتے 2:45اُتّے بس وَلا چل پئی ۔ اَساں اِتھّاں پھوٹو چھک کے اپݨے کیمرے رواں کیتے ۔ منظر تے جائیں سوہݨیاں ہَن ۔ 3:20اُتے راج پورا آ ڳیا ۔ اِتھّوں پٹیالہ 27ک ۔م تے کھٻے پاسے ہے ۔ اَساں اِتھوں سڄے پاسے دِلّی کن تھی ڳیوسے۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان