فلماں

خانپور ء ِچ ترائے منڈوے ہن ،گولڈن، ناز تے پیراڈائز ۔ وستی دے نینگر شوقین ہن ،بی ٹی ایم ء چ کم کرݨ آلے نینگر پندرہی گھن تے ٻاہروں  ٻاہر فلم تے ویندے ہن، اسیݙے کھوکھے توں  چاپت چیندے ہن ،فلم توں  آ تے اپݨا کھاتہ صاف کریندے ہن ، ادا مُستی تے ادا حبیب ایجھے ݙدھ ہن جو فلم دی ساری سٹوری سُنڑیندے ہن،سُݨ سُݨ تے اَکتے تھی ویندے ہاسے ،ݙو چار مہینے بعد سنگت نال فلم تے ویندے ہاسے پر اتنا زیادہ شونق کائناں  ہا،اُوں  ویلے زیادہ فلماں  پنجابی ہوندیاں  ہن،رَش وی ݙاڈھا ہوندا ہا ،ٹکٹ آلی کھڑکی دے سامھے لائناں  لڳدیاں  ہن، ٹانگے تے وݙے وݙے سائن بورڈ لا تے فلم دی منادی ݙیندے ہن،منادی آلے بی ٹی ایم تے اسیݙی وستی تے دھریجہ پھاٹک توں  تھیندے سہجے وی لنگھ ویندے ہن، سائن بورڈ تے کھڑکی تروڑ رش وی لکھیا کھڑا ہوندا ہا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان