فقیر غلام حیدر شر

میران تالپور دے دارالخلافہ خیر پور دے نیڑے تیڑے فقیر غلام حیدر شر سرائیکی دا شاعر گزرئیے او صاحبِ دیوان شاعر ہا۔ بلوچاں دے قبیلے ’’شر‘‘ اِچ جمیا ۔ ݙاکو کنوں درویشی دا درجہ پاتس ۔ سندھ دے مشہور درویش نانک یوسف دے ہتھ توبہ تائب تھیا۔ ہِیں ڳالھوں اوندا زمانہ 1783ء کنوں 1853ء تک دا تھی سڳدے۔(67)۔ سندھی اتے سرائیکی ݙوہیں زباناں وچ اوندا ڈھیر سارا کلام موجود اے۔ اوندا ہر شعر درد ِ محبت ‘ ہجر و فراق دے ساڑ ‘ ترکِ دنیا دی تلقین اتے ݙکھاں درداں نال بھریا ہویا ہے۔

ݙوہیں جہان وسر ڳیوسے جݙاں دلبر لائیاں دیداں

میں نہیں ماہی ہویا ہر دم ہوئیاں عیداں

غلام حیدر گم تھیوسے ݙتیاں عشق رسیداں

………

سک تساݙی سوہݨا سائیں من وچ مچ مچیندی

گھت دام زلف دا دلڑیاں کوں موتو قبل مریندی

توڑ خیال خودی دے خارج دلبر درد ونڈیندی

غلام حیدر غیر نہ چھوڑے وحدت ورہ وسیندی

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان