فقیر بخش ڳولو

فقیر قادر بخش ڳولو 1737ء وچ نصیر آباد ضلع دی ڳوٹھ محبت پور وچ پیدا تھئے ۔ آپ دے والد دا ناں بنگل خان ہئی جیڑھے ہک معزز تے سخی بلوچ مشہور ہن۔ آپ دی تعلیم و تربیت ٻہوں اچھے طریقے نال تھئی۔ چھوٹے عمر وچ والد دی وفات دے بعد سندھ دے مشہور شیخ کاپاری دی صحبت نصیب تھئی ۔ آپ سندھی ‘ فارسی ‘اردو ‘ سرائیکی زبان وچ شاعری کیتی۔ آخر کار آپ 85سال دی عمر وچ 1823ء وچ وفات پاتی۔ آپ دا مزار ڳوٹھ عاشق آباد تعلقہ جھٹ پٹ بلوچستان دے مشہور ڳوٹھ محبت پور توں ہک میل تے ہے۔ ہر سال اتھاں 25ذی الحج توں 27ذی الحجہ تک وݙے دھوم دھام تے عقیدت نال میلہ لڳدے۔

ݙوہڑہ

حمد حسن سردار دا آکھاں جنھیں جگ جوڑ بݨایا

ہر صورت دی تصویر اتے جتھاں نور سندا تھیا سایا

سرخ رنگا رنگ زردی پیلی گل گل لال اپایا

سونھن پری اسنان مزین زیب نوبیبی پایا

بلبل شوق تماشا گلشن جھٹ پٹ جھگڑا لایا

کرموں قادر بخش گدا کوں قادر محب ملایا

کافی

جوگی جادو گرہا مرلی نال ڳیا من مار

چھوڑیس چنگ فراق دا سوز بھر تار

آیا قسمت نال اتھاں ہا راہندا پورب بھار

گِرو پاساں گودڑی تھیساں دم نہ دھار

قادر بخش میں پھالاں پانواں ولسی کیڑھے وار

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان