فصلاں دے گیت
فصلاں دی رہکی تے اوندے تیار تھیوݨ کوں انسانی زندگی وچ وݙی اہمیت حاصل ہے۔ فصل دی تیاری تے پورے وسیب وچ خوشی تے اُمید دی لہر دوڑ ویندی ہے سرائیکی زبان وچ ٻہوں سارے فصلاں دے لوک گیت ملدن۔ کݨک دی کاپی ہووے تے بھانویں ونواڑیں دی چُݨائی ۔ سبزیاں تیار تھیووݨ دا موسم ہووے تے بھانویں پنݙوں پکن دی رُت ۔ لوک گیتاں وچ اے سارے سکھ دے سبب موجود ہن۔ونواڑ سرائیکی علاقے دی ہک ٻہوں وݙی نقد آور فصل ہے ۔ عورتاں پونڑی پا تے مزدوری کانبے کر تے واڑ چُݨدن۔ ونواڑاں دی چُنائی دا ہک مشہور لوک گیت جئیں وچ عورتاں دا ہک ݙوجھے کوں سݙݨ۔ ہار سنگھار کرݨ ۔ مزدوری خاطر گھروں بے گھر تھیوݨ ۔ ٻالاں دی ݙیکھ بھال‘ ہک ݙوجھے نال دل دے حال ونڈاوݨ تے ہک ٻے توں اڳوں ودھ ودھ تے واڑ چݨݨ دے سارے منظر ٻولاں وچ ٻدھے ڳن۔
آئی موسم ونواوڑ دی ۔ چݨدیاں کملیاں بھولیاں
ٹٻیاں تے چڑھ ہکلاں مارݨ
آ و ڑی کاکیاں ترڑ پے واڑ اِن
سݙ توں سݙ بھڄ آو ڑی بھڄ واڑ ہن اَڄ
ہک ٻئے دی وت ریس کروں بھر بھر بݨیندئیاں جھولیاں
پھیرے مار کے آنون ول
آ کے لہین ٻالاں دی کل
امڑی بھولی ۔ صدقے گھولی ۔ ݙیوے لولی
ٻال جھنڈولے ۔ ڈھاک تے ٹُردیاں مست ممولیاں
آئی موسم ونواڑ دی چݨدیاں کملیاں بھولیاں (54)
کھجی ایں علاقے دا سب توں وݙا میوہ ہے کھجیاں تھل روہی دیاں روݨقاں ‘ مسلماناں دے ایں علاقے وچ آوݨ دی یادگار ہن۔ کھجیاں دے موضوع تے کئی گیت ملدن اے زیادہ تر ݙوہڑیاں تے ڳاوݨ دی صف وچ ہن۔
اُچی تاں کھجی جیندے لال ٻوہارے
ہوواں طوطا گانمݨ یار ٹُک سٹاں چھوہارے(55)
کݨک اِتھوں دی ݙوجھی وݙی فصل ہے کݨک دے پکݨ اَتے گانمݨ دے کجھ ٻول:
پکیاں نی کݨکاں آبھوں کون کھویسی
تیں جیہاں ڳاوݨ یار میکوں کون سݨیسی
پکیاں نیں کݨکاں وچ تتراں دے پیرے
ٻوتھیاں کماݨیاں گانمݨ یار لتھے منہ دے چہرے (56)
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان