فرید ساجد لغاری دا خوبصورت کلام
غزل
حِجاب ہک ، درمیان رکھݨے
فِراق ویلھے دا دھیان رکھݨے
ہے کوݨ کل نئیں، ہے کہیں دا ویڑھا
میں عشق اِتھائیں امان رکھݨے
ضرور ہک ݙینہ ، حضور ملسن خدا تے کامل ایمان رکھݨے
وصال ویلھے دی ہیل سانگے
" سفر دا سارا سامان رکھݨے "
میکوں تاں مُلہم خبر ݙتی ہے مکین سانگے ، مکان رکھݨے
بغیر سچ ، کوڑ دے نتارے نہ کال کوٹھی گمان رکھݨے
فریدؔ خواجہ تے میرؔ وانگوں جے شعر لکھݨے میزان رکھݨے
کہیں سکندر دی قید وچ نہ
گُرو دے گروی کُئی گیان رکھݨے
تیݙے تَقرّب دے وانگ میں دل
تیݙی مُہاڑی تے آن رکھݨے
میں ارتقا دے حدیں دا ݙیکھیں ضرور ! وکھرا ، نشان رکھݨے
طلب تریہہ کوں کُریہہ دے ہوندیں
نظر نظر ہݨ جوان رکھݨے
تلاش کر ، استعارے ساجدؔ
ادب کوں جے جان! جان رکھݨے