فریدؒ تے حسینیت

حسینیت انسانی زندگی دا ہک ایجھا موضوع ہے جیندے تے ہر زمانے وچ ٻہوں کجھ لکھیا ڳیا ہے کیونجو ایہ موضوع حق تے سچائی دا ایجھا مینارہ نور ہے جینکوں دنیا دے سارے لوک محبت تے عقیدت نال ݙیکھدے ہِن ۔ ظلم دے اَڳوں ݙٹ ونجٖݨ تے وݙے وݙے نقصان دی پرواہ نہ کرݨ کوں مثالی زندگی آکھیا ڳیا ہے ۔ سچ کوں سچ آکھݨ تے کوڑ کوں کوڑ آکھݨ مہذب معاشرے دا وݙا وصف مَنیا ڳیا ہے ۔ جتھاں ایں وصف دا کال ہووے اُتھاں تباہی تے بربادی دا رستہ کُئی نہیں روک سڳدا۔

کربلا دا سانحہ اسلامی تاریخ دا ہک ایجھا باب ہے جیڑھا ایثار ، جرأت تے تسلیم و رضا دے واقعات نال پُر ہے ۔ انہاں واقعات انسانی تاریخ کوں متاثر کیتا ہے ۔ غیر مسلم دانشوراں وی ایں موضوع تے قلم چاتا ہے تے امام عالی مقام کوں مشکل وقت وچ کلمۂ حق آکھݨ تے نظم تے نثر وچ خراجِ تحسین پیش کیتا ہے۔

سرائیکی وچ حسینیت دے موضوع تے ٻہوں وݙا ذخیرہ موجود ہے ۔خواجہ فریدؒ وی امامِ عالی مقام کوں خراجِ تحسین پیش کرݨ وچ کہیں توں پِچھوں کائنی ریہے تے اہل بیت دے بارے وچ اپݨی تحریر ، تقریر تے کلام وچ عقیدت دا اظہار کیتا ہے ۔ خواجہ صاحبؒ حضرت فاطمہ الزہرہ رضی اللہ تعالیٰ عنہا دے مقام دے بارے وچ فرمایا ہے جو رسول کریمﷺ کوں انہاں نال ٻہوں محبت ہئی تے ایں سلسلے وچ ایں حدیث دا حوالہ ݙتا جو فاطمہ میݙے دِل دا ٹکرا ہے تے جئیں ایندے نال سختی کیتی گویا میݙے نال سختی کیتی۔

خواجہ صاحبؒ امام اعظمؒ دے بارے وچ فرمیندے ہن جو ساداتِ علوی دا ہک ٻال ݙوجھے ٻال دے نال صحن وچ کھیݙدا پیا ہا تے جونہی او ٻال انہاں دے سامݨے آندا تاں تعظیم کیتے کھڑے تھی ویندے ہَن ۔ ہک آدمی خواجہ صاحب دے کول آیا تے آکھیا جو میں سیّد ہاں تے آپ دا مرید ہاں ۔ میݙے حق اِچ دُعا فرمائو ۔ ایہ سُݨ تے خواجہ صاحب کھڑے تھی ڳئے تے اوندے حق وچ دُعا فرمائی ۔ احترامِ سادات دا ایہ جذبہ دراصل رسول اکرمﷺ نال محبت تے اہلِ بیت نال قلبی تعلق دی وجہ نال ہا ۔ تے ایں جذبہ دی موجودگی کہیں وی دل کوں منور کرݨ کیتے کافی ہے۔

وحدت الوجود دے مرکزی خیال والی کافی وچ امامین دے نال تھیوݨ والے ظلم دا تذکرہ ایں طرحاں فرمیندن:

شاہ حسنؓ کوں شہر مدینے زہر دا جام پلایا

کربلا وچ تیغ چلا کر ایڑھا کیس کرایا

خواجہ صاحبؒ اہل بیت دی اسلام دے چمن دی آبیاری کیتے ݙتی ڳئی قربانیاں کوں عقیدت تے احترام دی نظر نال ݙٹھا ہے ایں طرحاں حضرت علی کرم اللہ وجہہ‘ داذکر وی اُنہاندی بہادری تے شجاعت دے حوالے نال کیتا ہے:

سب اعلیٰ اعلیٰ شان ݙٹھم

حَسنین تے شاہ مردان ݙٹھم

ہک ٻئی کافی وچ فرمیندے ہِن:

کتھے حسنؓ حسینؓ شہید بݨے

کِتھے اسدُ اللہ ذیشان آیا

یزیدی لشکر بظاہر کامیاب ریہا لیکن ایہ کون نئیں جٖاݨدا جو حق دی راہ وچ فتح تے شکست کیتے کامیابی تے ناکامی دے پیمانے استعمال نئیں کیتے ویندے۔

تاریخ گواہ ہے جو ایں سانحے دا ہر کردار عبرت ناک انجام توں ݙوچار تھیا ۔ یزید دا لفظ اِی نفرت دی علامت بݨ چکیا ہے ۔ جݙاں جو حسینیت کل وی سربلند ہئی تے اَڄ وی سربلند ہے ۔ خواجہ صاحبؒ فرمیندے ہِن:

جِند اسیر جور جفا دی

دِلڑی قیدی کرب بلا دی

ݙسم رقیب یزید پلید

کتاب فوائدِ فریدیہ وچ جیڑھی خواجہ صاحب دی تصنیف ہے اِچ شامل نعت دا ایہ شعر اُنہاندی رسول اکرم  ﷺاور اُنہاندی اولاد نال محبت ظاہر کریندا ہے۔

سلطنت عالم اگر فریدؒ بخواہی

باش غلام ، غلام آلِ محمدؐ

ایندے علاوہ پنجتن پاک نال عقیدت دا عالم انہاندے ایں شعر توں وی بخوبی واضح تھیندا ہے۔

میں فقط پیدا ہوں وصفِ پنجتن کے واسطے

تشنہ ہے کوثر مِرے ذوقِ دَہن کے واسطے

حوالہ

فرید نامہ ، مصنف: اسلم میتلا ۔ ناشر: جھوک پبلشرز ملتان