فرُوکہ

ضلع سرگودھا دی تحصیل ساہیوال دا قصبہ ، ساہیوال توں 10کلو میٹر تے سلانوالی توں 12کلو میٹر دے فاصلے تے سرگوھا جھنگ روڈ تے واقع ہے ۔اے قبیلے دے ترائے بھرا وجہو، سجو تے پھیرو ہن۔انہاں ترائے بھراواں اپݨے ناں دیاں وستیاں قائم کیتیاں۔ سجو نے سجوکا ، وجہو نے وجہوکا تے پھیرو نے پھیرو کا۔ پھیروکا دی وستی ہولے ہولے فروکہ بݨ ڳی۔ ہُݨ اتھاں فروکہ قبیلے دے علاوہ بلوچ، کلیار تے ڈھڈی وغیرہ آباد ہن۔ ماضی اِچ اے علاقہ ساہیوال دے بلوچاں دے ماتحت ریہا۔ راجہ رنجیت سنگھ جݙاں ساہیوال کوں فتح کیتا تاں فروکہ وی سکھاں دے ماتحت آ ڳیا۔انگریزی عہد اچ اے ضلع شاہ پور تے وَل ضلع سرگودھا دا حصہ بنڑیا۔ ہُݨ اے ضلع سرگودھا دی تحصیل ساہیوال دا حصہ ہے ۔ 1989ء تک ایندا تھانہ وی ساہیوال ہا تے اتھاں ہک چوکی قائم ہے۔ ہُݨ اے درکھان والا تھانہ دا حصہ ہے۔ اتھاں ہک سکھ تارا سنگھ تے 1902ء اچ خالصہ ہائی سکول قائم کیتا ہا ۔ ایندی قدیمی عمارت احٖ وی موجود ہے ۔ ایں سکول اچ پرے پرے توں طالب علم پڑھݨ آندن کیوں جو ایندے بعد ہائی سکول صرف جھنگ اِچ ہوندا ہا۔

اتھاں محلہ حافظ آباد، امیر پوروستی، ارائیاں والا محلہ، محلہ سادات، محلہ بورڈنگ اتھاں دی رہائشی وستیاں جݙاں جو مین بازار تے سبزی منڈی تجارتی مرکز ہن۔ اتھاں طلباء تے طالبات دے ڈگری کالجز، ڈو ہائی سکول، پولیس چوکی تے کئی بینکاں دیاں شاخاں ہن۔اتھاں قالین تے کپڑے دی کڈھائی دی کاشتکاری ٻہوں سوہݨی تھیندی ہے۔فروکہ دی آبادی 1998ء دی مردم شماری دے مطابق 8478نفوس تے مشتمل ہئی۔