فرشی عیسٰی خیلوی

1940ء تا2014ء

فرشی عیسٰی خیلوی اپݨے زمانے دے معروف سرائیکی شاعر ہَن۔آپ دا ہک شعری مجموعہ وی ’’مہکار‘‘ دے ناں نال چھپ چکے ۔ علاوہ ازیں اوں زمانے مختلف اخبارات تے رسائل وچ وی آپ دا کلام چھپدا رہ ڳئے۔فرشی عیسٰی خیلوی شاعر ہووݨ دے نال نال ہک اچھے مقرر وی ہَن ۔شخصیت دے حوالے نال آپ ہک اچھے انسان ، انسانیت دے ہمدرد ، صاف گو ، حق پرست تے بے باک انسان ہَن ۔ جتھوں تک آپ دی شاعری دا تعلق ہے تاں ݙوجھیاں صنفاں دے نال نال غزل وی ٻہوں سوہݨی لکھدے ہَن۔ نمونہ کلام حاضر ہے۔

(1)غزل

جبر دی قید وچ رہوݨ میݙی تقدیر بݨ ڳئی اے

کسے دی زلف دا کنڈل میݙی زنجیر بݨ ڳئی اے

میݙے چہرے دے جھُریاں توں تیکوں معلوم تھی ویسی

میݙی زندگی دے ہر لمحے دی ہک تحریر بݨ ڳئی اے

ودا ٹُرداں نگر تیݙے ݙکھاں دا آسرا گھن کے

غماں دا شہنشاہ ہاں ، بے بسی جاگیر بݨ ڳئی اے

جیڑھے پاسے قدم چینداں سِتم ملدن زمانے دے

میݙی ہر آرزو میݙے کیتے شمشیر بݨ ڳئی اے

جوانی وچ جیڑھا فرشیؔ ہا تکیا خواب شہرت دا

ݙکھاں دے روپ وچ او اجٖ میݙی تعبیر بݨ ڳئی اے