فتح پور دی مسیت

سیکری دے محل کنوں نکلیوسے تاں ہک کلّے دے پندھ تے پوادھ آلے پاسوں اکبر دی اُساری ہوئی ہک اعلامسیت ہے جیکوں فتح پوری مسیت آکھیا ویندے تقریباً 30-25پوڑھیاں چڑھ کے اُتّے مسیت دے مین گیٹ تے ونڄ پچیوسے۔ جُتّی محافظ کول جُتیاں رکھیاں اَتے اندر پہہ ڳیوسے۔ مسیت دا صحن وݙاہے جیندے وچ سَڄے پاسے (اُبھّے کن) گُستان ہے ۔اوندے نال ‘ شیخ سلیم چشتی دی رہائش گاہ حالی تئیں کھڑی ہے جتھاں اکبر نے انہاںکوں رکھیا ہویا ہئی ۔ نال اِی شیخ سلیم چشتی دی قبر تے خنگاہ ہے جتھاں شیخ کوں 1572ء اِچ پوریا ڳیا ہا ۔ شیخ دی خنگاہ چِٹے سنگ مر مر نال بݨی ہوئی ہے ۔ مسیت دے صحن کنوں گزر کے اَساں مسیت دی محراب تئیں پُڄ ڳیوسے ۔ لوک دیگر دی نماز پڑھدے پئے ہَن ۔ میں ہک ویندے نمازی کنوں پُچھیا جو اِتھاں نماز پنج وقتی تھیندی ہے ۔ او نیں آکھیا جیا سئیں ! نال دے قصبے دے لوک اِتھاں باقاعدگی نال نماز پڑھدن ۔ اکبر 1574ء کنوں1586ء تئیں سیکری وچ ریہا ‘ ول اوہ دِلی اپݨے پُراݨے دارالخلافے کن وَل ڳیا۔

فتح پور دی جامع مسیت بہترین مغلیہ عمارتاں وچ ڳݨی ویندی ہے ۔ مسیت دے ٻاہر آ کے وَلا منظور شدہ بس تے ٻہ کے سیکری دے اݙے؍ٹیکسی سٹینڈ تے آ ڳیوسے ۔ساݙیاں کاراں دے ڈرائیور ساݙی تانگھ اِچ ہَن۔

حوالہ

کتاب: دِلّی ڈھائی کوہ۔ مصنف شوکت مغل، چھپیندڑ: جھوک پبلشرز ‘ ملتان