فانیؔ امر تسری

فانیؔ امر تسری دا اصل ناں غلام حسین ہا، اوہ ݙاہ فروری 1924ء کوں میاں فضل الدین ڄٹ  بسرا دے گھر امر تسر وچ پیدا تھئے۔تقسیم دے بعد اوہ ملتان آڳئے، تعلیمی معیار ایم اے اسلامیات تے فاضلِ طب و جراحت ہن ۔ مگر پیشہ درس و تدریس اختیار کیتا ہویا ہا ۔شاعری دا آغاز اوہ امر تسر توں کر چکے ہن ، اِتھ آکے اوہ ضیاء ؔصدیقی تے ارشد ؔملتانی توں اصلاح گھندے ہن۔فانیؔ صاحب اردو ، پنجابی تے سرائیکی دے سہ زبان شاعر ہن۔آپ دا ہک شعری مجموعہ وی ’’طریفلِ سخن‘‘ دے ناں نال چھپ ڳیا ہا ، جیندے وچ سرائیکی کلام وی شامل ہا تے ایویں ’’ سرائیکی مجلس ‘‘ ملتان دے ماہانہ طرحی مشاعریاں وچ پڑھیاں ونڄݨ آلیاں مختلف شعراء دیاں غزلاں تے مشتمل کتاب ’’ مینگھ ملہار‘‘ جیڑھی جو 1979ء وچ شائع تھئی ہئی، اوندے وچ وی آپدیاں 8طرحی غزلاں شامل ہِن۔جنہاں اچوں ݙو عدد غزلاں پیشِ خدمت ہن۔

(1)غزل

ہک چوکھے ہن زردار سڄݨ

ٻئے غربت وچ ہن تار سڄݨ

ہک حُسن دا ماݨ کریندے ہن

ٻئے جان توں ہن بیزار سڄݨ

جیڑھے دعوے ڈھیر کریندے ہِن

نہیں کہیں دے او غمخوار سڄݨ

میں ودّا رہساں نال تیݙے

جیویں پھُل دے نال ہے خار سڄݨ

اُف تیر اے تیݙے نیݨاں دے

لنگھ ویندے دل دے پار سڄݨ

توں بخشش واسطے منگ دعاء

ہیء فانیؔ اوڳݨ ہار سڄݨ