فاطمہ جناح تے ایوب خان
ایوب خان الیکشن کرایا ، مقابلے ءِچ فاطمہ جناح ہئی ۔ ایں الیکشن دی اتنی زیادہ سُدھ کینھی ، عمراں تھولی ہئی ۔ پر آکھدن جو ایں الیکشن ءِچ اسیݙی وستی دھریجہ نگر دے لوک فاطمہ جناح دے حامی ہَن ۔ کجھ وݙ وݙیرے ایوب خان دے وی حامی ہَن جو نمبردار ہر جاہ تے ایوب خان دا ورک کریندے ہَن ۔ اسیݙے غلام یٰسین فخری دے بارے ءِچ ݙسیندن جو او اپݨی قمیض تے لالٹین دا ٻلاّ لئی ودا ہا تے ہتھ ءِچ لالٹین چا تے فاطمہ جناح دا ورک کریندا ہا ۔ لالٹین فاطمہ جناح دا انتخابی نشان ہا ۔ وݙے ڳالھ کریندے ہَن جو ڈھیر لوک فاطمہ جناح دے ناں تے فخری صاحب کوں چِڑیندے ہَن تے فخری صاحب چیٹیں آ ویندا ہا ۔ آکھدن جو فاطمہ جناح کوں ہرایا ڳیا تاں سب توں وݙا ارمان فخری صاحب کوں تھیا تے او سہی سچ دیاں دھاڑاں مار تے روندا رہ ڳیا تے آکھدا رہ ڳیا جو ملک ءِچوں جمہوریت دا تݙا ولھٹیج ڳے۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان