فاروق محرم

ساڈے وسیب دے ہک ورسٹائل فنکار اچھے شاعر، فن،لے، سر رکھنڑ آلے گلو کار اتے با کمال خطاط تے محبتیں ونڈنڑ آلے انسان سئیں فاروق محرم (اف تونسہ شریف) دی تصویر اکھیں دے آگو گزری تاں روح مونجھا تھی گئے۔

گلہ انہیں دوستیں کیں نئیں جیرھے شاعری یا موسیقی دی ترویج کوں گناہ سمجھیندن۔ شاید شرعی طور تے قرآن و سنت دے حوالے نال اساں انہیں دی ترویج دے حق اچ کوئی وڈیاں ٹھوس دلیلاں وی نہ ڈے سگوں۔۔

لیکن سرائیکی موسیقی، فن و ثقافت واسطے کم کرنڑ آلے دوستیں اتے صاحب اختیار لوکیں کیں ضرور گلا ہے جو انہیں لوکیں دے مرنڑ دا انتظار پئے کریندن۔۔ شاید مرنڑ دے بعد انہیں دی عزت تھیسی۔ ایویں نویں نسل دے ادبی ذوق تے وی ترس اندے۔۔۔ جو ،،،،ٹوبھا تار لمیں دا،،، انہیں کوں اپڑیں اندر بڈائی پئے۔۔

انہیں ہیریں جیویں اپنے صلاحیتیں نال انصاف نہیں ورتیا اونویں انہیں کوں اساں وی اتنی پذیرائی نہیں ڈتی جتنا انہیں دے اندر دے فنکار داحق ہا۔ محرم سئیں دے گائے ہوئے کلام؛

،،،ساکوں نہ میت بنڑا،،،

،،روندیں نہ کر شام کی پاگل،،، تھی ویسوں بدنام ڑی پاگل،،،

،،،کون تھی سگدے سانویں تیڈے چندر چمدے پچھانویں تیڈے،،،،

ہا جو سارا قصور نیناں دا کیوں نہ ترٹدا غرور نیناں دا

بلکہ پورے البم کوں جتیں واری سنڑو سک نہیں لاہندی روح نئیں رجدا۔۔

انہیں دے اپڑاں نمونہ کلام پیش خدمت ہے۔۔۔

تیڈے ہوندیں ہوئیں تیڈی محفل وچ ساکوں ویندے یار کلہپ ماری،

بند لب جو ہن چپ کیتی پیوں جئیں جے جھئں رنگ وچ گپ ماری،

متاں محرم رنگ وچ بھنگ پووے ایں ڈر توں پئے ہیں مپ ماری،

تیڈے ناں دی ویل وصول کیتی کہیں جھنڑک ڈتی کہیں تھپ ماری۔۔

ہک بیا بند۔۔۔

تیڈے باجھ مٹھل کیا جیونڑ ہے اےجیونڑ تاں ہک ڈوہ لگدے،

تیڈی مہر دے موسم منہ کر گئے کوئی موسم ہے ساکوں پوہ لگدے،

ہے محرم سفر کلہیپے دا ہر قدم کئی سو کوہ لگدے، کوئی جھک آوے تاں کھوہ لگدے کوئی اچ آوے تاں روہ لگدے۔(شبیر لغاری)