فاروق شیخ

فاروق شیخ
معلومات شخصیت
ڄمݨ	25 مارچ 1948ء
تاریخ وفات	28 دسمبر 2013ء (65 سال)
وجہ وفات	دورۂ قلب
طرز وفات	طبعی موت
شہریت	بھارت (26 جنوری 1950–) ڈومنین بھارت
عملی زندگی
مادر علمی	سینٹ زیوئرس کالج، ممبئی
کم	اداکار ،  ٹیلی ویژن اداکار
پیشہ ورانہ زبان	ہندی
اعزازات
قومی فلم اعزاز برائے بہترین معاون اداکار
	IMDB پر صفحات

فاروق شیخ (ڄَمݨ دی تریخ: 25 مارچ، 1948ء – وفات دی تریخ: 27 دسمبر، 2013ء) ہک ہندوستانی اداکار، انسان دوست شخصیت اتے ٹیلی ویژن دے میزبان ہن۔ اوہ 1977ء توں 1989ء اتے 1988ء توں 2002ء دے درمیان ٹیلی ویژن دی سکرین تے فن دا مظاہرہ کریندے رہے۔ اردو/ہندی فلماں وچ سُنڄاݨ اتے شہرت حاصل کیتی۔ فاروق شیخ نے 2008ء وچ تقریباً اٹھ سال دے وقفے دے بعد فلماں وچ ول اداکاری شروع کیتی۔ اوہ اپݨی موت تائیں یعنی 27 دسمبر 2013ء تائیں فلماں نال جُڑے رہے۔ فلماں وچ انہاں دی اصل سُنڄاݨ متوازی سنیما یا تجرباتی سنیما توں ہئی۔ انہاں ستیہ جیت رے، مظفر علی، ہری شیک مکھرجی اتے کیتن مہتا جاہیں ہدایت کاراں دے نال کم کیتا ہئی۔ شروع دے ݙینہاں وچ اوہ ریڈیو دے معلومات عامہ/کوئز دے پروگراماں دی میزبانی وی کریندے۔ انہاں دا ٹیلی ویژن شو، "جینا اسی کا نام ہے" ٻہوں مقبول تھیا۔ 90 دی دہائی وچ انہاں دے ݙو ٹی وی سیریل "چمتکار" اتے "جی منتری جی" نے شہرت حاصل کیتی۔

انہاں ٹیلی ویژن تے ٻہوں سارے سیریل اتے شوز وچ کم کیتا اتے ایں طرحاں دے فیروز عباس خان دی ہدایت کاری وچ شبانہ اعظمی دے نال نال "تمہاری امرتا" (1992ء) وچ کم کیتا۔ اوہ جلوہ گاہ (تھیٹر) اتے پروڈکشن دے راز ڄاݨدے ہن۔ اتے اسٹیج تے اداکاری کر کے ٻہوں خوش تھیندے ہن۔ انہاں فلم "لاہور" تے 2010ء وچ بہترین معاون اداکاری تے قومی انعام نال نوازیا ڳیا۔ انہاں دی پہلی فلم "گرم ہوا" (1973ء) ہئی۔ ایندے علاوہ انہاں دیاں مشہور فلماں وچ "شطرنج کے کھلاڑی"، "نوری" اتے "امراؤ جان" شامل ہن۔ انہاں دی آخری فلم دا ناں "کلب 60" ہے۔ فاروق شیخ نے 32 فلماں وچ کم کیتا۔ انہاں کوں انہاں دی پہلی فلم "گرم ہوا" وچ کم کرݨ دا معاوضہ 750 روپے ملیا ہئی۔ فاروق شیخ گجرات دے شہر بدولی دے نیڑے ہک ڳوٹھ نشوالی، امراہلی ضلع بڑودا وچ پیدا تھئے۔ انہاں دا تعلق امیر زمیندار ٹٻر نال ہئی۔ انہاں دے پیو مصطفیٰ شیخ ممبئی وچ وکالت دے پیشے نال جُڑے ہوئے ہن۔ فاروق شیخ اپݨے پنج بھیݨ بھراواں وچ سب توں وݙے ہن۔

انہاں سینٹ میری اسکول، ممبئی توں تعلیم حاصل کرݨ دے بعد سینٹ جیویر کالج، ممبئی اتے ول قانون دی سند سدھارتھ کالج توں حاصل کیتی۔ اوہ کجھ ݙینہہ اپݨے پیو دے نال وکالت کریندے رہے۔ مگر اوہ وکالت دے میدان وچ کامیاب نہ تھی سڳے۔ فاروق شیخ قانون دے پیشے وچ ناکام رہوݨ دے بعد اداکاری اتے تھیٹر دی طرف رُخ کیتا۔ اوہ اپݨے کالج دے ݙینہاں وچ اداکاری اتے اسٹیج ڈرامیاں وچ ٻہوں سرگرم ہن اتے اتھائیں انہاں دی ملاقات اپݨی مستقبل دی شریک حیات، "روپا" نال تھئی۔ اوہ ٻہوں شستہ اردو وچ ڳالھ مہاڑ کریندے ہن اتے انہاں دا لکھݨ دا انداز وی ٻہوں سوہݨا ہئی۔ کئی فلمی مکالمہ نگار اپݨے مسودیاں دی زبان و بیان دی سند فاروق شیخ توں ڳھندے ہن۔ انہاں دا کلاسیکی اردو شاعری دا شوق ٻہوں اُچا ہئی۔ اکثر ولی دکنی، غالب، میر، مومن، فیض، مخدوم محی الدین اتے مجاز دے شعر گنگناندے ہن۔

فاروق شیخ اپݨے گھر آلیاں دے نال نویں سال دیاں چھٹیاں مناوݨ کیتے "دبئی" ڳئے ہوئے ہن جتھاں انہاں دا انتقال دل دی حرکت رُک ونڄݨ دی وجہ توں تھیا۔{تحریر: احمد سہیل}:::