فاروق خان لغاری

فاروق احمد خان لغاری سیاستدان ہا تے صدر پاکستان دے عہدے تک پہن٘چا ہا۔ سردار فاروق احمد خان لغاری 29 مئی، 1940ء کوں ڈیرہ غازی خان دے شہر چوٹی زیریں وچ پیدا تھیا۔ فاروق احمد خان لغاری اعلی تعلیم دے بعد سول سروس وچ شمولیت اختیار کیتی تے پوادھی پاکستان وچ ملازمت کیتی۔ بعد وچ انہاں سول سروس توں استعفیٰ ݙتا تے پاکستان پیپلز پارٹی وچ شامل تھی تے سیاسی زن٘دگی شروع کیتی۔ ذوالفقار علی بھٹو دے دور حکومت وچ سردار فاروق خان لغاری سینیٹ دا رکن منتخب تھیا تے پیداوار دا وزیر بݨیا۔ 1988 دے انتخابات دے بعد بجلی دا وزیر بݨیا۔ میر بلخ شیر مزاری دی نگران حکومت وچ وزیر خزانہ وی ریہا۔ 1933 دے عام انتخابات وچ فاروق خان لغاری قومی اسمبلی دا رکن منتخب تھیا تے بے نظیر بھٹو دی کابینہ وچ وزیر خارجہ مقرر تھیا۔ این٘دے بعد پاکستان دا صدر منتخب تھیا۔ فاروق لغاری 1996 وچ بے نظیر بھٹو دی حکومت کوں برطرف کیتا تے ملک معراج خالد کوں نگران وزیر اعظم مقرر کیتا۔ 1997 وچ چیف جسٹس سجاد علی شاہ دے نال تنازعہ دے بعد سردار فاروق لغاری صدر دے عہدے توں استعفیٰ ݙے ݙتا۔ بعد وچ انہاں ملت پارٹی دے ناں تے اپݨی سیاسی جماعت وی بݨائی تے بعد وچ اون٘کوں مسلم لیگ ق وچ شامل کر ݙتا۔ 2008 دے انتخابات وچ فاروق لغاری قومی اسمبلی دا رکن منتخب تھیا۔ سردار فاروق خان لغاری 20 اکتوبر 2010 کوں فوت تھی ڳیا۔