فاروق احمد خان لغاری

فاروق احمد خان لغاری
(اردو : سردار فاروق احمد خان لغاری)
معلومات شخصیت
پیدائش	29 مئی 1940ء   چھوٹی زیریں
وفات	20 اکتوبر 2010ء (70 سال)  راولپنڈی
وجہ وفات	مرض نظام قلب و عروقی
شہریت	پاکستان برطانوی ہند
جماعت	پاکستان پیپلز پارٹی (1973–2 دسمبر 1997) پاکستان مسلم لیگ ق (2002–20 اکتوبر 2010)
مناصب
وزیر برائے پانی و بجلی
برسر عہدہ 28 دسمبر 1988  – 6 اگست 1990
وزیر خارجہ پاکستان
برسر عہدہ 19 اکتوبر 1993  – 14 نومبر 1993
صدر پاکستان (8  )
برسر عہدہ 14 نومبر 1993  – 2 دسمبر 1997
عملی زندگی
مادر علمی	فورمن کرسچین کالج ایچی سن کالج سینٹ کیتھرینز کالج
پیشہ	سفارت کار ،  سیاست دان
ماء ٻولی	اردو
پیشہ ورانہ ٻولی	اردو

سردار فاروق احمد خان لغاری پاکستان دے ہک مشہور سیاست دان تے سابق صدر مملکت ہن۔

ابتدائی حیاتی

سرائیکستان دے ضلع ڈیرہ غازی خان دے نواحی علاقے چوٹی زیریں دے ہک زمیندار تے سیاسی ٹٻر وچ پیدا تھئے۔ انہاں نے ابتدائی تعلیم لاہور کنوں حاصل کیتی تے اعلیٰ تعلیم کیتے ٻاہر ملک ڳئے۔ وطن واپسی دے بعد سول سروس وچ شامل تھئے تے مشرقی پاکستان وچ فرائض انجام ݙتے۔ فاروق لغاری نے اپݨے اباں سئیں سردار جمال احمد لغاری دی وفات دے بعد سول سروس کنوں علیحدگی اختیار کیتی تے پاکستان پیپلز پارٹی وچ شامل تھی ڳئے۔ ایویں انہاں نے سیاسی زندگی دا آغاز کیتا۔

سیاست

فاروق لغاری ذوالفقار علی بھٹو دے دور حکومت وچ سینیٹ دے رکن بݨیے تے ولا وفاقی کابینہ وچ پیداوار دی وزارت دا قلم دان سنبھالیا۔ 1988ء وچ فاروق لغاری ہک واری وچ قومی تے پنجاب اسمبلی دے رکن منتخب تھئے تے اوہ اوں ویلے پنجاب دے وزیر اعلیٰ دے ہک مضبوط امیدوار سمجھیے ویندے ہن۔ پر پنجاب وچ پیپلز پارٹی دی حکومت قائم نہ تھی سڳی، جیندے وجہ کنوں انہاں نے صوبائی نشست چھوڑ ݙتی تے وفاقی کابینہ وچ بجلی دے وزیر بݨیے۔ 1990ء وچ انہاں نے پیپلز پارٹی دے ڈپٹی پارلیمانی لیڈر دے طور تے قومی اسمبلی وچ اپݨا کردار ادا کیتا تے بعد وچ مختصر عرصے کیتے بلخ شیر مزاری دی نگران حکومت وچ وزیر خزانہ وی رہے۔

صدرِ پاکستان

1993ء وچ سب توں زیادہ ووٹ ڳھن کے رکن قومی اسمبلی منتخب تھئے تے بے نظیر بھٹو نے انہاں کوں اپݨی کابینہ وچ وزیر خارجہ بݨایا تے صدر پاکستان بݨݨ تک اوہ ایں عہدے تے فائز رہے۔ سردار فاروق احمد خان لغاری صدارتی انتخابات وچ اپݨے مدمقابل حزب اختلاف دے امیدوار سینیٹر وسیم سجاد کوں شکست ݙے کے صدر منتخب تھئے۔ صدر منتخب تھیوݨ تے انہاں نے پیپلز پارٹی دی رکنیت کنوں استعفیٰ ݙے ݙتا۔ بعد وچ سردار فاروق لغاری تے بے نظیر بھٹو دے درمیان اختلافات پیدا تھئے تے نومبر 1996ء وچ آئین وچ ݙتے ڳئے اختیارات کوں استعمال کریندے ہوئے 58(2B) دے تحت بے نظیر بھٹو دی حکومت ختم کر ݙتی تے اسمبلیاں تحلیل کر ݙتے۔ فاروق لغاری نے بے نظیر بھٹو دی جاہ تے اپݨے ہک قریبی ساتھی تے پیپلز پارٹی دے رہنما ملک معراج خالد کوں ملک دا نگران وزیر اعظم بݨایا۔ ایں دوران احتساب کیتے احتساب آرڈیننس دے ناں نال ہک نیا قانون متعارف کرایا ڳیا، جیہڑا بعد وچ نواز شریف دے دور وچ احتساب ایکٹ آکھیا ڳیا تے سابق فوجی صدر جنرل پرویز مشرف نے ایں قانون کوں نیب یعنی قومی احتساب بیورو دا ناں ݙتا۔ فاروق لغاری نے احتساب آرڈیننس وچ ترمیم دا ارادہ کیتا تاں اوں ویلے نگران وزیر قانون فخر الدین جی ابراہیم نے ایندی مخالفت کیتی تے وزیر قانون دا عہدہ چھوڑ ݙتا۔ ایں عرصے وچ قومی سلامتی کونسل دی طرز تے ہک آرڈیننس دے ذریعے ہک ادارہ قائم کیتا ڳیا، پر آرڈیننس دی آئینی مدت ختم تھیوݨ دے بعد ایہ ادارہ ازخود ہی تحلیل تھی ڳیا۔ 1997ء دے انتخابات وچ نواز شریف دی جماعت مسلم لیگ ن بھاری اکثریت نال کامیاب تھئی۔ نواز شریف نے صدر دے اسمبلی تروڑݨ تے فوجی سربراہاں دی تقرری دا اختیار واپس گھنݨ دا فیصلہ کیتا تے ایں مقصد کیتے آئین وچ ترمیم کیتی تے ایں ترمیم دی منظوری کیتے اوں ویلے حزب اختلاف دی قائد بے نظیر بھٹو نے وی ترمیم دی مکمل تے بھرپور حمایت کیتی۔ 1997ء وچ نواز شریف حکومت تے سپریم کورٹ دے چیف جسٹس سجاد علی شاہ دے درمیان تنازعے دی وجہ کنوں صدر مملکت دے عہدے کنوں استعفیٰ ݙے ݙتا۔

ق لیگ

سردار فاروق احمد خان لغاری نے صدر پاکستان دا منصب چھوڑݨ دے کجھ عرصے بعد اپݨی نویں سیاسی جماعت دی بنیاد رکھی۔ لاہور وچ قائم تھیوݨ آلی ایں نویں جماعت دا ناں ملت پارٹی رکھیا ڳیا تے ایندے وچ پیپلز پارٹی دے ناراض رہنماواں تے کارکناں نے شمولیت اختیار کیتی۔ جنرل پرویز مشرف دے دور وچ اپݨی جماعت ملت پارٹی کوں اوں ویلے دی حکمران جماعت مسلم لیگ ق وچ ضم کر ݙتا۔ سردار فاروق لغاری نے 2008ء وچ تھیوݨ آلے عام انتخابات وچ رکن قومی اسمبلی منتخب تھئے۔

انتقال

20 اکتوبر 2010ء کوں انہاں دا انتقال راولپنڈی دے سی ایم ایچ ہسپتال وچ دل دی دھڑکن رک ونجݨ نال تھیا۔ چند گھنٹیاں بعد انہاں دے دل دی جراحت کیتی ونڄݨی ہئی۔