غلام مصطفٰے شارب

1977ء تا 2012ء

جی ایم شاربؔ جنہاں دا اصل ناں غلام مصطفٰے ہا ، آپ یکم دسمبر1977ء کوں ضلع لودھراں دی ہک وستی وچ پیدا تھئے ، بی اے بی ایڈ تک تعلیم حاصل کیتی۔تے ول محکمہ تعلیم اچ بطور ٹیچر بھرتی تھی کے اپݨی عملی زندگی دا آغاز کیتا ۔تے نال دے نال شاعری وی کریندے ہن۔شاعری دے حوالے نال ٻہوں جلدی اپݨے آپ کوں ادبی حلقیاں وچ منوا گھدا ۔اڄاں جی ایم شارب ؔ ٻہوں کجھ لکھݨا ہا جو موت دا قاصد ٹائم توں پہلے آڳیا ،تے آپ 4فروری 2012ء کوں ایں دارِ فانی توں کوچ کر ڳئے۔

غزل

او دلبر تاں یاری نبھا وی نہ سڳیا

او میکوں تاں اپݨا بݨا وی نہ سڳیا

کراں ایجھے رہبر دا یارو بھلا کیا

جو منزل تے میکوں پُڄا وی نہ سڳیا

رہی سیجھ خالی عمر ساری میݙی

میݙی سیجھ اُڄڑی سجا وی نہ سڳیا

میݙے پھٹ جگر دے ولا ساوے تھی ڳئے

او زخماں تے ملماں تاں لا وی نہ سڳیا

محبتاں دے شاربؔ ٻہوں بار ہوندن

او ہک بار الفت دا چا وی نہ سڳیا