غلام فقیر

مولانا غلام فقیر لغاری ڈیرہ اسماعیل خان دے قصبے ڈھکی دے رہݨ والے ہن۔ آپ دی پیدائش 1820ء دے نیڑے تیڑے تھئی آپ 10مئی 1938ء مطابق 1357ھ کوں وصال فرمایا۔ غلام فرید اُردو ‘سرائیکی تے فارسی دے شاعر ہن۔ آپ دے پوترے منشی بہاء الحق نے مجموعہ غلام فقیر دے ناں نال کئی مجموعے شائع کرائے۔

نمونہ کلام سوال و جواب گھڑا:

سوال:

آ وے گھڑا بھن ٹوٹے کرائیں تیں یار دی چیلھ رنجائی

ہک وی بھار اس پاݨی والا ݙوجھا ویندیں جان رلائی

عجب نصیب تساݙے گھڑا اساں مفتی عمر ونڄائی

جواب گھڑا:

مار نہ مینوں کر نہ ٹوٹے اساں بھارے بھار لنگھائے

پہلے کپے نال کہیاں ول وت گھر کمبھار دے آئے

ماراں سخت کمہاراں والیاں جھل چک تے سر کپوائے

بعد اس دے وچ آتش دے اساں سارے تن جلائے

جیڑے سنگی کھوٹے اساݙے تھی ٹوٹے گل سڈائے

اتنے اوکھ گزرئیے اساں ‘ تڈاں ہتھ محبوباں لائے

غلام فقیرا اوکھاں ٻاجھوں کہیں ہرگز وصل نہ پائے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان