غلام فرید جانی

ج:1962ء

غلام فرید ناں تخلص جانی ، اَبّے سئیں دا ناں حاجی محمدرمضان ہے ۔ فریدسئیں بہشتی سفیر لشاری کوں کلام ݙکھیندے ہَن ۔ ہُݨ مختار مست کوں ݙکھیندن ۔ سادہ تے محنتی آدمی ہِن۔

(1)

ݙسا ماہی میں کیا لِکھاں ، تیݙی کیا کیا وفا لکھاں

ہے دِل آہدی تیݙاسہرا ، میں ٻیٹھی وَل وَلا لکھاں

میں مر ونڄاں جے اپݨے تُوں ، تیکوں سوہݨا جُدا لکھاں

میݙی لُوں لُوں دیوچ توں ہِیں ، کیویں نانویں ٻیا لکھاں

میکوں اَحٖ خود ݙسا جانیؔ ، تیݙا کیا کیا بھلا لکھاں

(2)

ہر ہر ویلے ہجر دے ہنجوں کوئی لحظہ تاں ہَس گھنوں

خوشیاں جڳ ایویں نی ݙیندا کر ہمت تے کھس گھنوں

قید کلہیپ وچ کیویں گزری ساری رام کہاݨی

لوکاں کنوں لُک تے سانول ، ہک ٻئے کوں ایہ ݙس گھنوں

مُد گزری نی میل تھیا بھن رسم رواج دیاں کندھاں

کول میݙے اَحٖ رات تاں آ ، ٻہہ یاری دی چس گھنوں

چار ݙینہاں دی زندگی ساری نہ تھی مونجھا ماندا

نیڑے تھی آ رَل تے جانی ، لحظہ خوش تھی وَس گھنوں

بھانویں پُٹھڑی کھل لہاوِن بھانویں چاڑھن سُولی

نعرہ مار ، اَنا الحق جانی پی امرت دی رَس گھنوں

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان