غلام حُر خان کنداݨی

1942ء تا 2010ء

غلام حُر خان کنداݨی ضلع بھکر دے نمائندہ شاعر ہَن ۔ اوہ خوش اخلاق ، خوش مزاج ، خوش لباس تے انتہا درجے دے نفاست پسند ہَن ۔ تے انہاں دی شاعری وچ وی اوہا نفاست تے لطافت نظر آندی ہے ،آپ دی غزل دے حوالے نال معروف دانشور عاشق بزدار لکھدن جو ’’غلام حُر خان سرائیکی پینگھ تے نویں سروں چڑھدی غزل نال ایجھی پینگھ رسائی جو انہاں دی لکھی ہوئی غزل اسمان نال بر مچیندی نظر آندی ہے‘‘

بہر حال غلام حُر خان دی غزل دا نمونہ حاضر ہے۔

(1)غزل

کیا غزل دا معجزہ ہا کیا اثر تیݙا وی ہا

بٖس وچھوڑے ویݨ وچ دامن تاں تر تیݙا وی ہا

او وی ݙینہ ہن بخت دے ݙوپہر ہن میݙے اُتے

میݙے چہرے تے جبیں ہئی سنگِ در تیݙا وی ہا

زہر دا گھُٹ بھر چھوڑیئے سمجھے محبت دا حکم!

جتھ میݙی تقدیر ہئی اُتھ نامہ برتیݙا وی ہا

رو نہیں گھر دو جٖلوں رُل ڳئیں اَے دل جنگلاں دیوچ

ماء، بھرا ، ست بھاڳ ہِن ، ہک وسدا گھر تیݙا وی ہا

کل جیڑھا ماریا ڳیا بے وارثا بازار وچ

لوک آہدن حُرؔ فقیراں وچ قدر تیݙا وی ہا