غلام حسین کملا

1950ء تا 2017ء

غلام حسین کملاؔ مرحوم دا تعلق میلسی ضلع وہاڑی نال ہا، آپ درویش صفت انسان ہَن۔1970ء کنوں شاعری دا آغاز کیتا تے اوں زمانے دے معروف شعراء سید تبرک حسین رضوی تے نذیر اَذ فر کنوں اصلاح گھدی ۔ نمونہ کلام حاضر ہے۔

(1)غزل

کیوں تھیندا ہیں پریشان میاں

میں جھٹ دا ہاں مہمان میاں

تیکوں رب سئیں تاج محل بخشے

میکوں ݙکھ چا کیتس دان میاں

شالا خوشیاں وچ آباد رہیں

رب ہور ودھاوی شان میاں

تیݙا ہے جو بخت عروج اُتے

تیݙے تابع ہر انسان میاں

ݙینہ تھیسی تاں میں کملےؔ دا

نہ لبھسی نام نشان میاں

؎بندہ اڄکل آری تھی ڳئے

آری وی ݙو دھاری تھی ڳئے

حق دی ڳال کریندا کئی نئیں

کوڑ دا پلہ بھاری تھی گٖئے

میݙا یار وی ݙیکھو لوکو!

کملےؔ کانْ چنگاری تھی گٖئے

٭٭٭