غلام حسین زائر

1916ء تا1999ء

آپ دا تعلق ڈیرہ غازی خاں نال ہا استاد نور محمد سائلؔ ڈیروی دے ہمعصر ہن۔ آپ دے کلام اچ ڈٖکھ درد، ہجر فراق تے مونجھ مونجھاری پاتی ویندی ہے۔

نمونہ کلام

؎دل نہ تھی مونجھی توڑے اوکھے ڈٖیہاڑے آگٖئے

بھوگنْن ڈٖکھ ڈٖوڑے تے بھانویں ہکاڑے آگٖئے

وس دے اندر گٖالھ ہووے تاں کوئی چارہ تھیوے

اوکھ ہک مکدے نہیں بٖئے تھی ڈٖواڑے آ گٖئے

؎جے مہر دی دید چا بھالے پنل

چھوٹڑی دلڑی وڈٖا دل تھی ونجٖے

ہوسی زائرؔ اے وی لکھی لیکھ دی

ساڈٖا روونْ خلق دی کھل تھی ونجٖے

؎ایویں عشق چیتے کوں چکرا ڈٖیندا ہے

جیویں بٖال کھیڈٖن بھنوالی بھنوالی

٭٭٭