غلام ابن غلام ولد غلام

سرائیکی صوبہ منگنڑ آلے جاھل لوک

میکوں سمجھ نیں آندی کتری ہک کڈھاؤ صوبے دی گال تھیوے سہی ساڈے سوشل میڈیا آلے سنگھتی آن پوسٹاں مریندن کہ پوری فیس بک سرائیکی صوبہ بنڑی کھڑی ہوندی ہے، میں کھل پونداں اتناں کھلداں کہ میڈیاں ہنجوں نکل آندن، ہک لولہی لنگڑی اندھی گونگی اپاہج قوم دے نینگر کوں وڈکے کوں کیا تھئے جو پاگلیں آلیاں گالھیں کریندا بیٹھے،

میں جڈاں آپڑیں وسیب تے نظر مرینداں کڈھاؤ ہلکی جھئیں روشنی دی لکیر تک نظر نیں آندی البتہ ٹُردیاں پھردیاں لاشاں ضرور ڈیسدن، اج زرا آپڑیں شھر آپڑیں وستی دی حالت تے نظر مارو، بدبودار گلیاں اجڑیے سکول ویران ہسپتال، کرپشن ءچ لتھیے سرکاری ادارے،

پورے وسیب تے چند خاندانیں دا صدیاں توں قبضہ، اوہے ایم این اے اوھے ایم پی اے تے ناظم، انھائیں دے پالتو گُرلے کونسلر،

ہاہاہا، اساں کنیں ہک جتامے دا پتر کونسلر نیں وٹیج آندا گال کریندے ہیں صوبے دی، میڈا دل آھدے جیرھا سوشل میڈیا تے گندے روڈ گندیں گلیں دی پوسٹ لیندے اینجھے بندے کوں انھائیں گلیں ءچ بدھ سٹاں تے پُچھاں تہاکوں کیرھا کنجر الیکشن دے ڈینھ ہچھوڑکی بدھ کے پولنگ تیں ونج سٹیندا ہا جو ایں ایم این اے یا ایم پی اے کوں ووٹ ڈیوو،

انھیں خاندانیں کوں تیہتر سالیں توں مونڈھے تے چئ ودے ہاؤ اے مصینتاں لہیسو تاں کوئ مونڈھے ہؤلے تھیسن،

کائینا اساں نیں سدھرنڑاں بس صرف صوبہ گھنڑے،

اینجھی قوم صوبہ منگدی ودی ہے جئیندی وستی ءچ ہالی تک پانڑی بجلی گیس کائینی پہنچی، جئیندی وستی ءچ کتے انسانیں نال پانڑی پیندن ہک ٹوبھے تے، جئیندیاں، لاشاں، پانڑی ءچ تار کے قبرستان پہنچایاں ویندن، میت دا کھٹرا گندے پانڑی دے اتوں گزاریا ویندے،

جیرھی قوم دی دھی ان پڑھ رہ گئ ہے سکول نہ ہوونڑ دی وجہ توں، جئیندا پتر چار میل ٹُر کے پرائمری سکول ویندے، جئیندا نینگر ایم اے کر کے ریڑھی لئ ودے، ڈگریاں گھن کے سعودی دوبئ ءچ چھت بھرائ دی مزدوری کریندے، جئیں بچیں کوں پڑھاونڑا ہا او عربیں دے اُٹھ چریندا ودے

یاد رکھائے جڈاں تئیں، سردار پیر گدی نشین گودیں کوں ایویں مونڈھیں تے چئ رکھسو صوبہ تاں پریں دی گال ہے ہک پانڑی آلا بور وی مل ونجائے میڈی سزا گولی

غلام ابن غلام ولد غلام کوں صوبہ چھوڑ سولنگ آلی گلی کوئ نہ ڈیوے نہ حق دار ہے،

نوکریں کوں نخرے نہیں ٹھندے مکھنڑ،،،، جمیل بلوچ