غریب سیاست داناں دے ٹیکس دی ادائیگی

روز ݙیہاڑی ایہ خبراں آندیاں رہندِن جو ایں مُلخ دے حکمران ‘ سرمایہ دار ‘ تاجر تے وپاری ٹیکس ادا نہیں کریندے جے ادا وی کریندن تاں اوہ ٻہوں معمولی ہوندے ۔ مُلخ وچ سارا ٹیکس تنخواہ دار طبقہ ادا کریندے ۔ مُلخ وچ انکم ٹیکس ادا کرݨ آلے سارے لوکاں وچ 75فیصد سرکاری ملازم ہن اَتے صرف 25فیصد تاجر تے سرمایہ دار ہِن۔حد تاں ایہ ہے جو زمیندار‘ جاگیردار ‘ سیاستدان تاں اصلوں ٹیکس ادا کریندے اِی کوئنیں۔

ہک اخباری اطلاع مطابق کجھ سیاست داناں ‘ وزیراں ‘ مشیراں پچھلے ݙہ سالاں کنوں سرکار کوں ٹیکس نھیں ݙتّا۔ شیت ایہ لوک غریب ہوسِن ‘ اِنھاں کول فجر دی ہوسی تاں رات دی نہ ہوسی۔ظلم تاں ایہ ہے جو سرکاری ملازم دا ٹیکس سو روپے وی گھٹ ادا تھیا ہووے تاں نوٹس آ ویندے ۔ پچھلے سالاں وچ ایہ وی تھئے جو جنہاں پروفیسراں بورڈ تے یونیورسٹی دے پرچے ݙٹھے ہَن جنہاں دا معاوضہ 5سو روپے کنوں ہزار ݙو ہزار روپے ہئی ۔ سالانہ ٹیکس نقشے وچ ایں رقم دا اندراج نہ ہووݨ پاروں اُنھاں کوں پورا ٹیکس نہ ݙیوݨ دے نوٹس آ ڳے ۔کئی پیشیاں پِیاں اَتے مطلوبہ ٹیکس جہڑا ݙو چار سو روپے بݨیا ‘ جمع کرا گھدّا ڳیا۔ کیا انکم ٹیکس دفتر دے افسر‘ کمزور سرکاری افسراں کیتے اِی شیر ہِن ۔ وزیراں ‘ مشیراں دے اڳوّں ٻلّی بݨ ویندن ۔ سچ آہدن:

مرے کوں مارے شاہ مدار

ہُݨ ذرا اخبار دی اوہ تندیر ݙیکھو جہڑے سیاست داناں دے ٹیکس ادانہ کرݨ آلیاں بارے ہے ۔ پچھلے ݙہ سالاں کنوں تلویں سیاستداناں ٹیکس ادا نھیں کیتا ۔ فاروق احمد خان لغاری ‘ بلخ شیر مزاری ‘ اکبر بگٹی ‘ سید عبداللہ شاہ ‘ سید قائم علی شاہ ‘ سید مظفر شاہ ‘ منظور وٹو ‘ شاہد خاقان عباسی‘نواز کھوکھر ‘ محمود خان اچکزئی ‘ میر ظفر اللہ جمالی ‘ اکبر لاسی ‘ فیصل صالح حیات ‘ خالد کھرل ‘ حامدناصرچٹھہ ‘ نصیر اللہ بابر۔ ایں تندیر وچ صدر وی شامل ہے ۔ وزرائے اعلیٰ وی ہِن تے وزیر وی ۔ اِنھاں غریباں کیتے قوم دُعا کرے جو اللہ اِنھاں دی معاشی حالت سُدھارے تاں جو ایہ سرکار کوں ٹیکس ݙیون۔

خبر وچ ایہ وی ݙسّیا ڳے جو 1994-95ء وچ تلویاں سیاست داناں ٹیکس نھیں ݙتّا ۔ اِنھاں غریب سیاستداناں دے وی ناں ݙیکھو:

ذوالفقار مگسی ۔ اسفند یار ولی۔ مولانا فضل الرحمن ۔ پروفیسر خورشید احمد ۔

بیگم نسیم ولی خان ۔ قاضی حسین احمد ۔ مختار اعوان ۔ اجمل خٹک ۔ سلیم اکبر بگٹی

خبر مطابق ایں مالی سال 1995-96ء اِچ کجھ سیاست داناں ٹیکس ادا کیتے اَتے قوم دے خزانے اُتّے ٻہوں احسان کیتے ۔ اِنھاں کروڑاں پتی سیاستداناں دا ٹیکس ملاحظہ کرو:

میاں نواز شریف (2680/-روپے)۔ بے نظیر بھٹو (2647/-روپے)

آصف زرداری(17732/-روپے)۔ نصرت بھٹو(7864/-روپے)

مرتضیٰ بھٹو (64014/-روپے)

قوم کوں چاہیدا ہے جوحکومت کوں درخواس کرے جو اِنھاں اُتلیاں ساریاںسیاستداناں دی قوم دے خزانے کنوں امداد کیتی ونڄے تاں جوایہ مالی طور تے صحت مند تھی کے قوم تے مُلخ دی پوری طرح خذمت کر سڳن۔

بھلا گِروان ہووے تاں

(نومبر1996ء)

حوالہ

کتاب: گِروان ہووے تاں. دھرتی واس : رانجھݨ ملتانی. چھپیندڑ: جھوک پبلشرز ‘ ملتان