عید میلاد النبیؐ

مدرسہ سراج العلوم خان پور ءِچ میلاد شریف دا جلسہ تھیندا ہا (ہݨ وی تھیندے)، وݙے وݙے مولوی اَمدے ہَن ،اساں  پہلے ݙینھ جلوس ءِچ ویندے ہاسے ۔ سارا ہفتہ جلسہ جاری رہندا ہا ، چنگے عالم داوعظ ضرور سُݨدے ہاسے ۔ ہک رات مامے منظوردی ہٹی تے ٻیٹھے ہاسے ،اوں  آکھیا اَڄ رات مولانا شاہ احمد نورانی دا خطاب ہے تے مخدوم مرید حسین مخدوم رشید آلے کافی پڑھسن۔ اساں  سارے پیریں  ٹُر پیوسے ۔ میتلیں  آلے کُتے پچھوں  بھڄ پے ، ڄݨے ڈھیر ہاسے ، ہکل ہوڑ کر تے نکل ڳیوسے ۔ نورانی صاحب دی تقریب تے مخدوم مرید حسین دی کافی سبحان اللہ ۔ چھیکڑ ءِچ نورانی بی بی حلیمہ دی لولی پڑھی ، سویلے منہ اندھارے کوں  وَل آیوسے ،تِل جتی تھکیڑا وی نہ تھیا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان