عید تے تقریر

ماماں  میݙا قربانی آلی عید تے تقریر کریندا ٻیٹھا ہا ، ہِیں  عید تے سارے حلال زناور سر سٹی کھڑے ہوندن ، اللہ دی بارگاہ ءِچ استدعا کھڑے کریندے ہوندن ، میݙا اللہ سئیں  آں  میݙی واری آوے ، ٻیا آکھدے میݙا اللہ سئیں  آں  ، میݙی واری آوے۔ ایویں  جگ جہان دے ہر زناور دی ایہا آس تے ایہا ارداس ہوندی اے ۔ نماز پڑھ تے آیوسے ، مامے بہادر خان جمالی دی اسیݙے مامے سئیں  نال ݙاڈھی یاری ہوندی ہئی ۔ ݙوہیں  ہتھ جوڑ تے مامے کوں  آکھدے ، اے ݙیکھ ہاں  مولوی آ ، زناور شودے رسے ترڑوائی ودے ہوندن توں آکھدیں  ، سر سٹی کھڑے ہوندن ۔ ݙاند ہوویں  توں  تے قصائی ہوواں  میں  ، پتہ لڳ ویسے۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان