عیداں

سیویں  آلی عید تے قربانی آلی عید جوش خروش نال گزریندے ہاسے ، قربانی آلی عید دا تاں  ݙاہ ݙینھ پہلے پتہ لڳ ویندا ہا پر سیویں  آلی عید دا ہک ݙینھ پہلے تئیں  پتہ نہ لڳدا ہا، ڈھیر تانگھ سیویں  آلی عید دی ہوندی ہئی ، روزے رکھ تے تھکے ودے ہوندے ہاسے ہر عید تے 29چندر دی دُعا منگدے ہاسے ، مراد کمبھار اسیݙے کٹھے پڑھدا ہا ، اَکھیندا دُعا کرو 30روزے تھیون ، اساں  دِلوں  وی تے اُتوں  اُتوں  وی 29دی دُعا منگدے ہاسے ۔ دلوں  سارے ایہو چہندے ہن پر اُتوں  اُتوں  آکھدے ہن جو 30تھیون ۔ عید گاہ ءِچ جھنڈیاں  لیندے ہاسے ، صفائیاں  کریندے ہاسے تے چونے نال صفاں  سدھیاں  کریندے ، وݙی عید گاہ ہئی ، تھک پمدے ہاسے ، عید نماز دے بعد کھاوݨ پکاوݨ تے کچاریاں  ہوندیاں  ہن ۔ چوری آلی تے ٻیاں  عیداں  وی ہوندیاں ہن۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان