علی رضا دانشؔ

تاریخ پیدائش: 1995ء

علی رضا دانشؔ دے اَبا سئیں دا ناں چودھری محمد اسلم ہے ۔ علی رضا وستی ارائیاں موضع محراب آلا اِچ 1995ء اِچ پیدا تھئے ۔ انہاں دے بھراشاہد یاسر وی سرائیکی شاعری کریندن۔ نویں نینگر ہِن چنگا پندھ کریسن۔

میں تیݙے خواباں دے ٻوٹیاں کوں پٹ نمہی سڳدا

اِنہاں دے پُھل تاں میں ہنجوں دے نال پالے ہِن

غزل

میݙے رقیب ، میݙے یار ݙٹھے بھالے ہِن

تہوں تاں میݙے لباں تے چُپ دے تالے ہِن

میں تیݙے خواباں دے ٻوٹیاں کوں پٹ نمہی سڳدا

اِنہاں دے پُھل تاں میں ہنجوں دے نال پالے ہِن

میݙی وفا تے کݙاہیں نہ شک کریں سانول

میں تیݙے درد تاں ساہ وانگ سئیں سنبھالے ہِن

وَل اَکھیں نال اشارے تے کِھل کراہیں ݙیکھن

اے ڳالھا دِل آ ! اے ظالم دے نویں چالے ہِن

اَڄاں وی وقت ہے کہ ہوش کر ملک دا واسی

اے تیݙے ملک دے حاکم تاں دِل دے کالے ہِن

سَنیہا حق دا زمانے کوں ݙیوݨے دانشؔ

بھانویں جو ساݙی زباں تے ظلم دے چھالے ہشن

(2)

کچیاں اَکھیں ، کچے خاب

کݙݨ تھیسن ، سچے خاب

ساݙیاں اَکھیں ساویاں تھیون

ساکوں وی کوئی پچے خاب

اَکھیں لال انگارے تھی ڳن

اَکھیں چ نئیں رچے خاب

اوکوں ݙیکھ تے اَکھ وچ میݙی

مست الست تھی نچے خاب

دانشؔ سارے خواب تُرٹ ڳن

میکوں کوئی نئیں بچے خاب

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان