علی احمد کرد

علی احمد کرد مشہور وکیل تے سپریم کورٹ بار ایسوسی ایشن دے سابق صدر ہن۔ اوہ 1948ء وچ کوئٹہ وچ ڄمیے۔ دوران طالب علمی سیاست وچ حصہ ڳھدا تے حکومت وقت دی پرزور مخالفت کرݨ دے باعث صرف ستارہ سال دی عمر وچ جیل یاترا کر ݙتی۔ ایندے بعد اوہ جمہوریت دے بے خوف سپاہی بݨ کے آمریت تے پے درپے وار کرݨ لڳے۔ دراصل علی احمد کرد دا تعلق بلوچستان دے ہک ممتاز علمی تے سیاسی خاندان نال ہے۔ میر عبد العزیز کرد انہاں دے چاچا ہن جنہاں نے ویہویں صدی دے اوائل وچ میر یوسف عزیز مگسی دی معیت وچ انگریزیں دے خلاف تحریک مزاحمت شروع کیتی ہئی۔ ایویں غاصباں تے آمروں دے خلاف مزاحمت علی احمد کرد کوں گھٹی ہی وچ مل ڳئی۔

سیاسی جدوجہد

کرد نے جݙݨ ایل ایل بی دا امتحان ݙتا تاں پولیس انہاں دی ڳول وچ ہئی۔ ایہ انہاں دی خوش قسمتی ہئی کہ اوہ امتحان ݙیوݨ دے بعد ہی اوندے قابو وچ آئے، ورنہ کرد دا تعلیمی سال برباد تھی ویندا۔ 1973ء وچ ایل ایل بی کرݨ دے بعد اوہ کوئٹہ وچ وکالت کرݨ لڳے۔ ایں سال کرد کوں ہک کوڑے کیس وچ پھسا ݙتا ڳیا۔ ایویں انہاں کوں چار سال جیل وچ گزارݨے پئے۔ رہائی دے بعد اوہ ولا بلوچستان بار کونسل دے رکن بݨیے۔ 1973ء وچ جݙݨ بھٹو صاحب نے بلوچستان نیشنل عوامی پارٹی دی حکومت کوں برطرف کیتا تاں علی احمد کرد احتجاج کرݨ آلے اولین رہنماویں وچ شامل ہن۔ حتیٰ کہ گورنر اکبر بگٹی دے خوف توں پارٹی دے رہنما زیر زمین چلیے ڳئے، اݙݨ وی طلبہ دے نال برطرفی دے خلاف مظاہرے کریندے رہے۔ ایویں اوہ اکبر بگٹی دی نظراں وچ ناپسندیدہ شخصیت ٹھہریے۔ انہیں ݙیہاڑیں کرد نے کوئٹہ دی کبیر بلڈنگ وچ زیادہ وقت گزاریا جتھاں سردار عطا اللہ مینگل بیٹھے رہندے ہن۔ ایویں اوہ اکبر بگٹی دے جال وچ پھسݨ توں بچ ڳئے۔

وکلا تحریک

علی احمد کرد 9 مارچ 2008ء وچ چیف جسٹس افتخار محمد چودھری دی معطلی دے بعد شروع تھیوݨ آلی تحریک وچ قومی افق تے نمودار تھئے تے اپݨیاں تقاریر نال ایں تحریک وچ نویں روح پھونک ݙتی۔ پیپلز پارٹی دی حکومت دی وجہ توں وکلا تحریک کجھ عرصے کیتے ماند پئی ڳئی ہئی، پر اکتوبر 2008 دے آخر وچ علی احمد کرد نے سپریم کورٹ بار ایسوسی ایشن دے انتخاب وچ سرکاری امیدوار کوں شکست فاش ݙتی تاں تحریک وچ نویں جان پئی۔ ایں انتخاب توں ایہ وی ثابت تھیا کہ فتح آخر سچ دی تھیندی ہے۔

شخصیت

تقریر کریندے ہوئیں علی احمد کرد شعلہ جوالہ بݨیے نظر آندن، پر عام زندگی وچ اوہ وݙے مہذب، نفیس تے رحم دل انسان ہن۔ فارغ اوقات وچ کرد کوں پہاڑیں تے چڑھݨ تے فطرت دی آغوش وچ چلݨ پھرݨ پسند ہے۔ اوہ کوئٹہ دے گردونواح وچ کھڑے تمام پہاڑاں دی سیر کر چکیے ہن۔