علاء الدین حسین شاہ

علاء الدین حسین شاہ (1494ء – 1519ء) قرون وسطیٰ دے اواخر وچ بنگال دے خود مختار سلطان ہن اتے حسین شاہی خاندان دے بانی ہن۔ او حبشی سلطان شمس الدین مظفر شاہ دے قتل دے بعد تخت تے ٻیٹھے، جیندے عہد وچ او وزیر ہن۔ انہاں دے بعد انہاں دے پتر نصیر الدین نصرت شاہ جانشین تھئے۔ حسین شاہ دا اصل ناں سید حسین ہئی اتے انہاں دے عرب نژاد ہووݨ دی تائید ملدی ہے۔ او غالباً پہلے مرشد آباد دی وستی چاندپارہ وچ مقیم ہن اتے 1494ء وچ اتھائیں ہک مسجد تعمیر کروائی ہئی۔ انہاں نے خفیہ طور تے باغیاں دی حمایت کیتی اتے ول علانیہ طور تے انہاں دی قیادت کریندے ہوئے قلعہ دا محاصرہ کر ڳھدا۔ مظفر شاہ قلعہ وچ مارے ڳئے اتے ایں طرح بنگال وچ حبشی سلطنت دا خاتمہ تھیا۔ علاء الدین حسین شاہ دا دور حکومت مذہبی رواداری کیتے ڄاݨا ویندا ہے۔ انہاں نے اپݨی رعایا دے نال مذہبی لحاظ توں فراخدلانہ سلوک کیتا۔ مشہور سنت چیتنیا مہاپربھو اتے انہاں دے پیروکار انہاں دے دور وچ بنگال وچ بھکتی دی تبلیغ کریندے ہن۔ حسین شاہ نے اپݨے قاضیاں کوں ہدایت ݙتی ہئی کہ چیتنیا مہاپربھو کوں نہ روکیا ونڄے۔ انہاں دے انتظامی عملے دے ݙو اعلیٰ ہندو افسران، روپا گوسوامی اتے سناتن گوسوامی وی چیتنیا مہاپربھو دے پیروکار بݨ ڳئے ہن۔