عظمت خان بڈاݨی
997ھ؍1580ء
عظمت خان بڈاݨی سرائیکی زبان دا ہک گمنام شاعر گزرئیے۔ آپ میر آدم خان بانی ترنڈا آدم (سندھ) قبیلے دے فرد ہن۔ آپ دا والد سردار اجمل خان مری میر چاکر اعظم دے شاہ سواریں وچ شمار تھیندا ہا۔ جݙاں چاکراعظم 1488)ء ۔ 1555ء) دی تے گھرام خان لشاری دی جنگ دا آغاز تھیا تاں میر چاکر اپݨے ٹٻر دیاں زنانیاں تے ٻال ٻچے اوچ بنوٹ دی طرف اجمل خان دی حفاظت وچ روانہ کیتے۔ اوں وقت عظمت 18-17سال دا ہک نینگر جوان ہئی۔ عظمت خان عربی ‘ فارسی دی تعلیم وی حاصل کیتی ہوئی ہئی۔ اپݨے والد دی وفات دے بعد قوم مری بڈاݨی دا سردار بݨیا۔ عظمت خان سرائیکی زبان دی چنگی چوکھی شاعری کریندا ہئی۔ انداز صوفیانہ ہا۔ آپ دیاں نظماں استاوہ نامہ ‘ معلّیٰ نامہ ‘ مشہور تھیاں ۔ ایندے علاوہ انھاں ݙوہڑے تے مناجاتاں وی لکھیاں۔ صوفی احمد جان دے مطابق تقریباً1580ء وچ عظمت خان فوت تھے۔ نمونہ کلام:
عشق ٻاجھوں انسان نہ بھلا توڑیں ہووے میر امیرے
درد برھوں محبوب دے ݙتڑے عشق دی حق تاثیر اے
چاون بار ہجر دے عاشق صدق وصال اخیرے
عظمت عشق حقیقی دی حق پیر ݙتی جاگیرے
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان