عطا محمد عباسیؔ

اصل ناں      عطا محمد

تخلص         عباسیؔ

جمن           1953ء

تعلیم           میٹرک

پیشہ            ریٹائر ملازم(پرائیویٹ)

فون نمبر         03345092148

جاہ پتہ          معرفت مدینہ میڈیکل سٹور نیو لاری اڈا ،جوہرآباد ، خوشاب

سئیں عطا محمد عباسی دے پیڈ پیپر تے ایہ شعر لکھیا ہوئے ۔

ساری عمر عباسی ؔ ڈکھ پیتم

دُدھ وانگوں سُرک سُرک کے

علاوہ ازیں پریس رپورٹر تے ریڈیو اینڈ ٹی وی شاعر لکھیا ہوئے۔ بقول عطا محمد عباسی ؔآپ ریڈیو تے ٹی وی توں کئی اعزازات وی حاصل کر چکے ہن۔ بہر حال عباسی صاحب ہک اچھے شاعر ہوون دے نال نال ہک اچھے انسان وی ہن ۔آپ دا نمونہ کلام پیش خدمت ہے۔

(1) غزل

یاداں دی  تصویر پرانی تھی گئی ہے

ہن تاں میڈی سوچ  سیانی تھی گئی ہے

میں ہک ونج کے کیکوں کیکوں  سمجھاواں

رَت جو  اج  ہر کہیں دی پانی  تھی گئی ہے

جیندا پھُلاں نال حوالہ ڈیندے ہن

 اج او کیویں  شکل  نمانی تھی گئی ہے

ول نہیں سنگدے گزرے وقت جوانی دے

او کوچہ  او شام  ان  جانی تھی گئی ہے

کون عباسیؔ درد پلیسی میں وانگوں

نویں پود  مزاج دی  رانی تھی گئی ہے

(2) غزل

وت کہیں بنری دا ہویا ہے گزر ایں تھل وچوں

سرخ رنگ دی ہے نظر آندی سحر ایں تھل وچوں

خاک ڈسدی پئی ہے یارو ریت دے ٹبیاں اُتے

کون وت بیٹھا ہے ساڑی گھر دا گھر ایں تھل وچوں

کون وت سسی دے وانگوں ریت تے ٹردا ریہا

وت ڈکھاں دا کیں ہے کیتا طے سفر ایں تھل وچوں

پھس گیا ہے وت کوئی تشنہ پرندہ جال وچ

وت شہر دو اُڈ کے آندے پئین پر ایں تھل وچوں

ٹھوکراں کھاندا وداں میں وی عباسیؔ آن کے

لُٹ گھدی ہے کئیں بھلا میڈی نظر ایں تھل وچوں