سئیں عطا اللہ شاہ بخاری ہِک دینی تے سیاسی رہنما ہن، جِہڑے مجلس احرار اسلام دے بانی ہن۔ اوہ 1891 وِچ پٹنہ وِچ پیدا تھئے۔ اُنّھاں دا آبائی وطن ناگڑیاں (ضلع گجرات، پنجاب، پاکستان) ہا۔ پر اُنّھاں دے پیو مولوی ضیاء الدین احمد تبلیغ دے کم کِیتے پٹنہ آ گئے ہن۔ سئیں طالب علمی دے ویلے توں ای سیاسی تحریکاں وِچ حصہ گِھندے ریہے۔ 1918 وِچ کانگریس تے مسلم لیگ دے مشترکہ جلسے وِچ حصہ گِھن٘دے ہوئیاں اُنّھاں دی سیاسی حیاتی دا اَغاز تِھیا۔ ایہ جلسہ تحریک خلافت دی حمایت وِچ امرتسر وِچ تِھیا ہَئی۔ اُنّھاں نے اپݨی پوری حیاتی سفر وِچ گزاری تے ہندوستان دے سارے علاقیاں دا دورہ کیتا۔ اُوہ اپݨے زمانے دے مشہور مقرر ہن تے لوک اُنّھاں دیاں تقریراں سُݨن کِیتے دور دور توں آندے ہن۔ سیاست وِچ اُنّھاں کوں "پنڈت کرپا رام برہمچاری، امیر شریعت تے ڈنڈے والا پیر" دے ناں نال وی سُن٘ڄاݨیا وین٘دا ہَئی۔ اُنّھاں نے 18 سال تئیں قید و بند دیاں صعوبتاں بھوڳیاں۔ 1929 وِچ اُنّھاں نے اپݨے ٻیلیاں نال رَل کے مجلس احرار اسلام ناں دی ہِک سیاسی جماعت بݨائی تے کئی سال اِیندی سربراہی کیتی۔ مجلس احرار تحریک پاکستان دی سخت مخالف ہئی۔ سئیں عطا اللہ شاہ بخاری دا اَکھاݨ ہا جو "میں جِتھاں وی تقریر کیتی اے، میں پاکستان کوں مسلماناں کِیتے خطرناک آکھیا اے۔"[١]
سئیں عطا اللہ شاہ بخاری 23 دسمبر 1892 کوں پٹنہ وِچ پیدا تھئے۔ اُنّھاں نے ابتدائی تعلیم امرتسر وِچ حاصل کیتی تے مفتی غلام مصطفیٰ قاسمی کولوں صرف نحو تے فقہ پڑھی۔ 1915 وِچ پیر سید مہر علی شاہ آف گولڑہ شریف کولوں بیعت کیتی۔ پہلے اوہ تحریک خلافت دے خلاف ہن پر پِچھوں سید داؤد غزنوی دے آکھݨ تے ایندی حمایت کر گئے تے اِیندی تحریک وِچ اُنّھاں دی خطابت دا بڑا کم ہَئی۔ 1921 وِچ اُنّھاں کوں گرفتار کر گِھدّا ڳیا۔ مارچ 1930 وِچ لاہور وِچ علامہ سید انور شاہ کاشمیری نے اُنّھاں کوں "امیر شریعت" دا خطاب ݙِتا تے ہزاراں لوکاں نے اُنّھاں تے بیعت کیتی۔ اوہ تحفظ ختم نبوت دی تحریک وِچ وی بہوں فعال ریہے۔ 1931 وِچ "مجلس احرار اسلام" بݨی تے اوہ اِیندا حصہ بݨ ڳئے۔ سئیں عطا اللہ شاہ بخاری تحریک پاکستان دے مخالف ہن پر پاکستان بݨݨ دے بعد اُنّھاں نے اپݨی مخالفت بند کر دِتی۔ سئیں عطا اللہ شاہ بخاری ملتان وِچ قبرستان جلال باقری، باغ لنگے خان وِچ سُتّے ہوئے ہن۔ اوہ شاعری وِچ ندیم تخلص کریندے ہن تے اُنّھاں دا مجموعہ کلام "سواطع الالہام" دے ناں نال شائع تھی چکیا اے۔ 21 اگست 1961 کوں اوہ جھوک لݙا ڳئے۔[٢]
برطانوی ہند
