عدنان صمد گاݙی

عدنان صمد گاݙی ہک پاکستانی اداکار ہے جیڑھا ڈرامہ سیریل "عہدِ وفا" وچ اپݨے کردار گلزار حسین دی وجہ توں مشہور تھیا۔ او ضلع ڈیرہ غازی خان دی تحصیل تونسہ شریف دی بستی گاݙی جنوبی وچ ڄمیے ہن۔ ایں نسبت نال اینکوں عدنان گاݙی دے ناں توں وی ڄاݨیا ویندے۔

عدنان صمد گاݙی نے ابتدائی تعلیم اپݨے آبائی علاقے وچ حاصل کیتی۔ بعد وچ اوں نے کوٹ ادو دے پنجاب کالج توں ایف ایس سی کیتی۔ اداکاری دے شوق دی وجہ توں اوں نیشنل اکیڈمی آف پرفارمنگ آرٹس (ناپا) کراچی توں پرفارمنگ آرٹس دی ڈگری حاصل کیتی ہے۔

عدنان صمد گاݙی نے کراچی وچ سینئر اداکار طلعت حسین دی اکیڈمی توں وی اداکاری دی تربیت حاصل کیتی۔ اینکوں "عہدِ وفا" وچ کردار وی اتھاؤ ملا۔ اوندے سرائیکی لہجے تے عبور دی وجہ توں اینکوں اے کردار ݙتا ڳیا۔

"عہدِ وفا" وچ ایندی اداکاری کوں ٻہوں پسند کیتا ڳیا تے اینکوں ٻہوں مقبولیت ملی۔ ایں ڈرامے دے علاوہ اوں نے کجھ ٻئے ڈرامیاں وچ وی کم کیتے جیندے وچ "سکون" شامل ہے۔ عدنان صمد گاݙی ہک باصلاحیت اداکار ہے تے مستقبل وچ ایندے توں مزید چنڳی پرفارمنس دی توقع کیتی ویندی ہے۔