عثمان فقیر سانگی

آپ جامڑی سانگی لاڑکانہ دے وسو واݨ ہن آپ دے والد دا ناں خیر محمد ہے۔ آپ دی پیدائش 1782ء اتے وفات 1862ء وچ تھئی۔ آپ فارسی دی چنگی چوکھی تعلیم حاصل کیتی۔ عثمان فقیر سانگی خواجہ عبدالحی تے انھاندے پتر شاہ نصیر نقشبندی دے مرید ہن تے عقیدت مند ہن۔(65)کلام صوفیانہ تے جذب و مستی نال بھریا ہویا ہے کلام وچ درد تے مونجھ ملال دے جذبات نشابر ہن۔ آپ وحدت الوجود دے قائل ہن آپ دی ہک مشہور کافی:

یار ݙاڈھی عشق آتش لائی ہے

وے یار سانوں لڳ ڳئی بے اختیاری

سینے دے وچ نہ سمائی ہے

ہُل ہلا کر عشق جو آیا

محبت ݙاڈھا شور مچایا

تھاں تھاں ناچ نچائی ہے

عشق اویڑا ٻہݨ نہ ݙیندا

تھی گدا گر مست کریندا

گھٹی گھٹی تاں گھمائی ہے

عشق دی آتش ایہو عثمان

لنگھ کے ویندی لاہو مکان

عرش کنوں تاں آئی ہے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان