عبدالکریم ناشاد
اصل ناں عبدالکریم
قلمی ناں عبدالکریم ناشادؔ
جٖمنْ 1962ء
تعلیم پرائمری
پیشہ زمیندارہ
فون نمبر 0334 8711616
جاہ پتہ موضع تل شمالی داجٖل تحصیل جٖام پور ضلع راجن پور
عبدالکریم ناشادؔ دا تعلق احمدانْی خاندان نال ہے، اوہ 1962ء کوں حاجی شملہ خان احمدانی دے گھر پیدا تھئے۔بنیادی تعلیم صرف پرائمری ہے، عملی زندگی دا آغاز زمیندارہ تے شعر و شاعری کنوں کیتا۔شاعری دے حوالے نال سید عنصر شاہ بخاری کوں اپنْاں استاد تسلیم کریندن۔شاعری دے نال نال اوہ گلوکاری وی کریندن۔ خصوصََا صوفیانہ کلام قوالی دے انگ اچ گٖاندن۔جتھوں تک آپ دی شاعری دا تعلق ہے تاں آپ خوبصورت شاعری کریندن۔ آپ دے کئی شعری مجموعے وی چھپ چکے ہن ۔نمونہ کلام پیشِ خدمت ہے۔
غزل
[لکھو | ماخذ وچ تبدیلی کرو]میڈٖے مولا محبت وچ نکھیڑے نہ بنْاویں ہا
لکھی ہاوی وفا جیکر تاں جھیڑے نہ بنْاویں ہا
میڈٖی توبہ میڈٖی زاری میں ودھ کے بٖول کیوں بٖولاں
شہنشاہی جے ہئی پل دی تاں دھیڑے نہ بنْاویں ہا
میڈٖی مظلوم دل کولوں نہ پچھ کیویں گزردی ہے
جدائیاں پا کرائیں ول گھر تاں نیڑے نہ بنْاویں ہا
ازل توں گھن کے اجٖ تونْیں طلب دی تانگھ تئی رہ گٖئی
سفر ساڈٖی جے ہَن قسمت تھکیڑے نہ بنْاویں ہا
میں ہاں ناشادؔ دھانہیں وچ میکوں کافر نہ لکھ چھوڑیں
اَڑا اکھیاں دے پکھیاں کوں بکھیڑے نہ بنْاویں ہا
غزل
[لکھو | ماخذ وچ تبدیلی کرو]سا ری سا ری رات تیڈٖے خواب ڈٖہدا رہ وینداں
توں تاں ہردم رُسدا رہندیں ، میں منیندا رہ وینداں
دل دی دنیا نال تیڈٖے ہئی خوشی شبرات دی
غیر بھاہیں لا چھوڑیندن ترلے پیندا رہ وینداں
بٖاجھ تیڈٖے کون ہے میڈٖا سجٖنْ سوچا نوہی
پیرے چم چم کئی دفعہ میں روح رہیندا رہ وینداں
چھوٹی چھوٹی گٖالھ تے اتناں رسیماں ٹھیک نئیں
ہُنْ تاں نہ ونجٖ ڈھول ماہی قسماں ڈٖیندا رہ وینداں
کیا خبر ناشادؔ ماہی کیندی من کے ٹُر گٖیا
میں کولوں کیا تھئی خطا ہے نت سوچیندا رہ وینداں
٭٭٭