عبدالکریم جھنگوی:1086ھ

مولانا عبدالکریم جھنگوی جھنگ دے رہݨ والے ہن۔ سرائیکی شاعری دے ایں پہلے دور وچ مولانا عبدالکریم جھنگوی کوں ایں واسطے ݙاڈھی اہمیت حاصل ہے کہ انھاں دی مشہور تصنیف ’’نجات المومنین‘‘ صدیاں توں سرائیکی علاقے دے دینی مدارس وچ پڑھائی ویندی رہ ڳئی اے تے ایندے کئی قلمی تے پُراݨے چھپے ہوئے نسخے اَڄ وی جا جا تے مل ویندن۔ مولانا عبدالکریم اپݨی کتاب ’’نجات المومنین‘1086ھ وچ مکمل کیتی۔ ’’نجات المومنین‘‘ دے علاوہ ’’معیار الایمان‘‘ اور ’’نجات الایمان‘‘ وی انھاں دی تصنیف ہن۔ جیڑھیاں ہُݨ نایاب ہن۔ ’’نجات المومنین‘‘ دے سنِ تصنیف بارے مولاناآہدن:

ھجرت ھک ہزار بھی اُتے چھیاسی جان

اے رسالہ فقہ دا کیتا رب آساں

نام نجات المونین اینہ رسالے جان

پڑھ اے عمل کریسی جو کوئی رھسی وچ امان

فرائضِ غسل ‘ تیمم ‘ خواتین دے مسائل بارے بیان ۔ احکامِ سفر ‘ فرائض ِ نماز ‘ فرائض روزہ ‘ حج ‘ زکوٰۃ تے گناہِ کبیرہ وغیرہ بارے بیان شامل کیتے ڳن۔ فقہ دے ایں رسالے وچ آسان اور عام فہم انداز وچ شرعی مسائل دی وضاحت کیتی ڳئی اے۔ مولانا عبدالکریم جھنگوی دی زبان چسولی تے دل چھکویں ہے۔ او کم توں کم الفاظ وچ اپݨا مطلب بیان کرݨ دی قدرت رکھدن۔ کتاب دے پہلے بند وی خود ایں طرف اشارہ کریندن کہ’’ لفظ تھوڑے تے معنی ٻہوں‘ ایہو اساݙا اسلوب ہے‘‘۔ کتاب دا پہلا بند حمد و نعت توں شروع تھیندے۔

نمونہ کلام:

سب ثناء خدا نیوں جیندا کل جہان

بہت درود رسولؐ نوں لتھا جیں فرقان

کہئناں درود بھی آل تے جستے اوہ خوشنود

ھووے ساریاں مومناں لکھ ہزار درود

پھیر اصحاب رسولؐ دے جنھاں شرف عیاں

وت دوست سبھے رسولؐ دے جملہ مسلمان

لفظ تھوڑے تے معنی بہتے رکھن یاد اسان

جے کوئی عمل کریسی اس تے چھٹسی اُس جہان

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان