عبداللہ عامر دریشک

اصل ناں      عبداللہ عامر

قلمی ناں       عبداللہ عامر دریشک

ڄمݨ           1978ء

تعلیم          میٹرک

پیشہ           زمیندارہ

فون نمبر        0333 7053333

جاہ پتہ         راجن پور شہر

شعری مجموعہ ’’مونجھا سفر‘‘ دے خالق عبداللہ عامر دریشک دا شمار ضلع راجن پور دے نمائندہ شاعراں وچ تھیندے۔آپ خدا داد صلاحیت دے حامل فطری شاعر ہن۔سرائیکی شاعری دیاں تقریبََا ساریاں صنفاں لکھدن ، تے ہر شعر اوزان دی ترکڑی توں تُل کے لہندے۔مجال اے جو کہیں شعر اچ جھول ہووے۔شخصیت دے حوالے نال وی عامر دریشک صاحب ہک خوش اخلاق ،ملݨسار تے فراغ دل انسان ہن۔ جتھوں تک آپدی غزل دا تعلق ہے تاں آپ غزل دے نفیس مزاج مطابق خوبصورت غزل لکھدن۔نمونہ کلام حاضر ہے۔

غزل

توڑے اپݨے گھر وچ رہ ڳیوں

سارا وقت سفر وچ رہ ڳیوں

ݙردیں ݙردیں وقت گزاریئے

سدھ نی کیندے ݙر وچ رہ ڳیوں

روہی تھل دامان دے پاندھی

پل پل جنگل جھر وچ رہ ڳیوں

سدھ نی کتنے سال گزر ڳئے

بھال تیݙی ہئی در وچ رہ ڳیوں

ازلوں جو اے دان تھیا ہے

ہکے شوق دے شر وچ رہ ڳیوں

عامر سچ الویندے رہ ڳیوں

جتناں خوف خطر وچ رہ ڳیوں