عبدالقادر آزاد

حضرت مولانا ڈاکٹر سید محمد عبد القادر آزاد 1939ء کوں برصغیر پاک و ہند دی مشہور مجذوب شخصیت اتے پیر حضرت سید محمد سعید احمد شاہ پیرزادہ عرف پیر پٹھان، پیر افغانی دے ہاں پیدا تھئے۔ ولادت دے بعد آپ ناں سید عبد القادر آزاد تجویز کیتا ڳیا۔ جیویں ہی اے ٻال گود وچ آیا تاں خاندان دے ہر فرد نے آپ بارے پیران پیر حضرت شیخ عبد القادر جیلانیؒ دے سلسلہ تصوف دا وارث بݨݨ دی نوید ݙتی۔ آپ نے ابتدائی تعلیم اپݨے پیو محترم حضرت مولانا پیر سید محمد سعید احمد شاہ پیرزادہ توں حاصل کیتی۔ اعلیٰ تعلیم حاصل کر کے مدرسہ قاسم العلوم ملتان توں سند فراغت حاصل کیتی۔ مولانا ڈاکٹر سید محمد عبد القادر آزاد زندگی بھر علم و حکمت دے حصول وچ منہمک رہے۔ آپ نے ’’حکیم الامت مجدد ملت مولانا اشرف علی تھانوی بحیثیت مفسر قران‘‘ وچ پی ایچ ڈی کر کے ڈاکٹریٹ دی سند حاصل کیتی۔ ریاست بہاولپور وچ آپ نے مرکزی درس گاہ اسلامی مشن توں تدریسی خدمات دی ابتدا کیتی۔ آپ ایں ادارہ دے مہتمم اتے پرنسپل دے فرائض وی سر انجام ݙیندے رہے۔ 1970ء وچ آپ لاہور تشریف ڳھن آئے اتے مشہور عالمگیری بادشاہی مسجد دی خطابت دے فرائض آپ سپرد کیتے ڳئے۔ یاد رہے جݙݨ توں بادشاہی مسجد لاہور اتے جامع مسجد دہلی مغل بادشاہاں نے تعمیر کیتیاں تݙݨ توں مغل بادشاہاں نے اے ݙونہیں مساجد پیر پٹھان پیر افغانی کبیرآلا شریف دے حوالے کر ݙتیاں کیونکہ پچھلے چوݙہ سو سالاں توں ایں خاندان دی دین اسلام کیتے خدمات قابل قدر ہن۔ عالمگیری بادشاہی مسجد دی امامت و خطابت سب توں زیادہ ڈاکٹر حضرت محمد عبد القادر آزاد دی ممد و معاون ثابت تھئی او انہاں دی بے نیازی سرچشمی اتے استغناء ہئی۔ انہاں نے دین دی خدمت کیتے اعلیٰ طبقیاں اتے جدید تعلیم یافتہ حضرات وچ تبلیغ و اصلاح دین کوں اپݨا نصب العین بݨایا۔ مولانا آزاد ہک محنتی اتے انتھک انسان ہن، بیکار ٻہوݨ انہاں کیتے امر محال ہئی۔ مولانا آزاد سادگی، نفاست، پاکیزگی متانت دا مزاج رکھیندے ہن۔ آپ انداز گفتگو دلکش، خندہ جبیں اتے زبان وچ مٹھاس ہئی۔ ضرورت منداں دا مجمع رہائش گاہ تے ہر وقت موجود رہندا، دسترخوان ہر وقت وچھا رہندا۔ کوئی سائل کوئی سفارشی سب کوں جیب وچ ہتھ پاء کے جیہڑا نکلدا مٹھی بند کر کے ݙے ݙیندے۔ جبہ اتے دستار آلے وی آپ دے کول آندے اتے شرٹ پتلون آلے سب دے نال محبت دا سلوک فرمیندے۔