عبدالرزاق زاہد دی کتاب ۔ خدا دی وستی
لکھت: ظہور دھریجہ,جھوک سرائیکی ملتان
[لکھو | ماخذ وچ تبدیلی کرو]اڄ لوک کائنات کوں گلوبل ویلج آکھدن پَر ایں دنیا دا صحیح ناں ”خدا دی وستی“ہے، اساݙے دوست، سنگتی تے نِکے بھرا عبدالرزاق زاہد سئیں دی کتاب دا ناں وی ایہو ہے، ایں توں پہلے زاہد سئیں دی کتاب دا ناں ”ݙو انگلیں اَسمان“ وی سوہݨا ہا، شاعری وی ماشاء اللہ سوہݨی ہے۔ ݙوجھی کتاب آوݨ دی ٻہوں خوشی ہے تے میں ہر واری آکھداں جو میکوں نویں کتاب آوݨ دی ایویں خوشی تھیندی ہے جیویں ٻال جٖاوݨ دی۔قوماں کتاب نال وݙیاں تھیندن، سرائیکی ءِ چ آکھدوں لکھیا لوہا تے الایا ڳوہا۔ عبدالرزاق زاہد چنڳا شاعر ہووݨ دے نال نال چنڳا انسان وی ہے، اپݨی دھرتی، اپݨی مٹی تے اپݨے وسیب نال محبت کریندے، شاعری ہک حوالہ ہے جیکر اساں انہاں دے کم کوں ݙیکھوں تاں انہاں دے کم دے ڈھیر سارے حوالے ہن، تھولی عمر ءِ چ ڈھیر سارا کم کیتے، عاجزی، انکساری انہاندا ورثہ ہے جو انہاں دے ݙاݙا استاد سئیں احمد خان طارق عاجزی انکساری دی بہترین مثال ہن۔
وݙے لوک ٻے کوں عزت ݙے تے خوش تھیندن، ایہو کم عبدالرزاق زاہد دا ہے، عبدالرزاق زاہد ادبی تے ثقافتی تقریبات کرویندے رہ ویندن، ہر آئے کوں عزت ݙیندن۔ مہمانیں کوں اُتے ٻلہیندن تے آپ تَلے تھی ٻہندن۔ انہاں شاعری دا آغاز 1999ء توں کیتا، سئیں شاکر مہروی کوں استاد بݨایا تے سرائیکی مشاعریں ءِ چ شرکت دے نال نال خود وی مشاعرے کرائے، 2006 توں 2008ء تئیں اپݨے استاد سئیں شاکر مہروی دے زیر سایہ کوٹ ادو وچ وݙے مشاعرے کروائے، اپݨی تنظیم پاکستان اہل قلم دا اجراء کیتا تے کوٹ ادو پریس کلب ءِ چ ٻہوں وݙی اہل قلم کانفرنس کرائی۔ 2014ء وچ سئیں احمد خان طارق دی کوٹ ادو ءِ چ تاج پوشی کرائی ڳئی، احمد خان طارق کانفرنس دی صدارت دا اعزاز راقم کوں بخشیا ڳیا، اے کانفرنس احمد خان طارق ادبی ثقافتی سنگت کوٹ ادو دی طرفوں منعقد تھئی۔ جھوک سرائیکی ملتان دے وچ وی اہل قلم کانفرنس کرائی ڳئی جیندے وچ ایوارڈ زتے شیلڈاں ݙتیاں ڳیاں، عبدالرزاق زاہد اپݨے ݙاݙا استاد سئیں احمد خان طارق دے ناں تے ادبی رسالہ ”الطارق“ دا کوٹ ادو توں اجراء کیتا۔
اے ساریاں ڳالہیں میں ایں واسطے لکھدا پیاں جو ادب دے طالب علمیں کوں سُدھ ہووے جو کئیں بندے کتنا کم کیتے۔ عبدالرزاق زاہد ادبی دنیا دے نال نال شوبز دے میدان وچ وی پیر پاتا تے ترائے سرائیکی فلماں بدلہ، زندگی، اعتبار بݨایاں تے ٹی پی گولڈ توں ریلیز تھیاں، انہاں ہک فلم محافظ وچ وی کم کیتا۔ عبدالرزاق زاہد دا اول تے آخر حوالہ سرائیکی رہ ڳئے۔ عبدالرزاق زاہدپاکستان سرائیکی رائٹرز فورم دے چیئرمین ہن تے ایں ویلے ایں فورم توں ڈھیر سارا کم کریندے پن، پچھلے سال انہاں تھل ءِ چ سرائیکی اجرک فیسٹیول کرایا تے جیرھا جو یادگار ہا، ہر پاسے سرائیکی اجرک دی بہار ہئی۔
ادبی ثقافتی سوچ دے نال نال عبدالرزاق زاہد ٻہوں اعلیٰ سیاسی سوچ رکھدن، سرائیکی صوبے واسطے نا صرف کم کریندن بلکہ دوستیں کوں وی آکھدن جو جے توݨیں اساݙا صوبہ نہ بݨسے اساݙے مسئلے حل نہ تھیسن۔ صوبہ سرائیکستان دی تحریک دے حوالے نال انہاں اساݙی جماعت سرائیکستان قومی کونسل دا ڈھیر ساتھ ݙتے تے ہمیش اساݙے مونڈھے نال مونڈھا رلئی اَمدن۔ سچے تے حقیقی سرائیکی سوجھواݨ ہن تے انشاء اللہ اساں سارے رَل تے ٻہوں جلدی اپݨی منزل حاصل کریسوں، جݙاں وی وسیب دی ادبی، ثقافتی تے سیاسی تاریخ لکھی ویسے اوں ویلھے عبدالرزاق زاہد دا ناں سرفہرست ہوسے۔ کتاب دی اشاعت تے ڈھیر مبارکباد ݙینداں تے اے وی آکھداں جو عبدالرزاق زاہد دی کتاباں تے انہاں دی جدوجہد انشاء اللہ وطن وسیب دی سنجٖاݨ تے صوبہ سرائیکستان دی واگزاری دا پیش خیمہ ثابت تھیسن۔