عبدالرزاق بھٹی

اصل ناں       حاجی عبدالرزاق

قلمی ناں       عبدالرزاق بھٹی

جٖمنْ           1952ء

تعلیم           میٹرک

پیشہ            ڈاکٹر(اَتائی)

فون نمبر        0300 8898038

جاہ پتہ         خیر پور ٹامیوالی ضلع بہاولپور

خیر پور ٹامیوالی کوں سرائیکی ادب دا گٖڑھ سمجھا ویندے۔ہک زمانہ ہا اتھاں حضرت ریاض رحمانی سرائیکی ادب دے فروغ واسطے’’بزمِ ریاج رحمانی‘‘دی بنیاد رکھ کے ماہانہ طرحی مشاعریاں دا اہتمام کیتا ہا تے ول ایں سلسلے کوں انہاں دے صاجزادے رشید عثمانی وڈٖے احسن طریقے نال اگٖوں تے ٹوریا۔’’بزمِ ریاض رحمانی‘‘دے ادبی ماحول توں خیر پور ٹامیوالی دے بٖہوں سارے نوجوان متاثر تھئے ،شعری تربیت حاصل کیتی تے شعر و ادب دے میدان وچ اپنْے آپ کوں منوایا۔جنہاں اچوں ہک قابلِ ذکر معروف ناں حاجی عبدالرزاق بھٹی دا وی ہے ۔بھٹی صاحب اردو تے سرائیکی دے خوبصورت لبٖ و لہجے دے شاعر تے کئی شعری کتاباں دے خالق ہن۔’’سوچاں دا پندھ‘‘ آپ دا مشہور سرائیکی شعری مجموعہ ہے۔ نمونہ کلام ۔

(1)غزل

کنْاویں دھپ دے ڈٖیوے جو شجر چنگٖاں نہیں ہوندا

جو گھر غیرت توں خالی ہے او گھرچنگٖاں نہیں ہوندا

خدا طاقت جے ڈٖیوے تاں غریباں کوں نہ تڑپھاؤ

خدا دا ڈٖر رکھو دل وچ فخرچنگٖاں نہیں ہوندا

میڈٖی وستی دے سردارو بنْو وستی دے رکھوالے

ڈٖرو جو بد دعاواں دا اثرچنگٖاں نہیں ہوندا

برائی توں بچنْ انسان دا ہے فرض دنیا تے

جیڑھا بچدا نہیں اوندا حشرچنگٖاں نہیں ہوندا

تکبر بھیڑی شئے ہے ایں کنوں دامن بچا کے رکھ

اے ایجھاں ونْ ہے جو ایندا ثمرچنگٖاں نہیں ہوندا

سمجھداں میں جو دنیا یار ہے رزاقؔ پیسے دی

زیادہ پیار پیسے دا مگرچنگٖاں نہیں ہوندا