عبدالجبار نیازی

اصل ناں       عبدالجبار

تخلص         نیازیؔ

جٖمنْ           1970ء

تعلیم          ایف اے

پیشہ           سکول ٹیچر

فون نمبر        0331 6003506

جاہ پتہ       شہر روجھان ضلع راجن پور

ادبی تنظیم ’’سرائیکی ادبی سنگت فیضؔ فقیر ‘‘ روجھان دے صدر عبدالجبار نیازی کوں شاعری دا شوق بچپن توں ہا،استاد فیض فقیر دی رہنمائی وچ 1990ء کنوں اپنْی شاعری دا آغاز کیتا جو تاحال جاری و ساری ہے۔نیازی صاحب اردو سرائیکی تے بلوچی دے سہ زبان شاعر ہن۔آپ استاد فیضؔ فقیر دے زمانے انہاں نال استادی شاگردی دا رشتہ قائم رکھیا تے ہُنْ انہاں دے پتراں نال بطور دوست نتھّی رہ ویندن۔جتھوں تک نیازی صاحب دی شاعری دا تعلق ہے تاں آپ خوب صورت لبٖ و لہجے دے شاعر ہن۔خصوصََا غزل بٖہوں سوہنْی لکھدن۔نمونہ کلام حاضر ہے۔

غزل

وقت دی گرداب وچ تھی لاپتہ پچھدے ودوں

شہر اپنْے وچ اساں اپنْاں پتہ پچھدے ودوں

گنگدام ساڈٖی سوچ ہے، گنگے ساڈٖے جذبات ہن

لا علم تے انْ جٖانْ تھی ول ول ولا پچھدے ودوں

کیوں فکر کوں جیونْ کیتے نہ سوچ دا کوئی در ملے

وحشت توں ڈٖر اپنْے اندر کر کر الا پچھدے ودوں

آیا ودا ہاں شہر وچ گھنساں مگر انمول شئے

ڈٖسو کہیں انسان توں ملسے وفا پچھدے ودوں

آکھیا ہمی، روکیا ہمی، ٹوکیا ہمی، ہٹکیا ہمی

پاگٖل نہ بنْ نیازیؔ سدا مل گٖئی سزا پچھدے ودوں