عامر خان (اداکار)

عامر خان (اداکار)
(انگریزی : Aamir Khan)
معلومات شخصیت
ڄمݨ	14 مارچ 1965ء (60 سال)  ممبئی
شہریت	بھارت
ذال	کرن راؤ (28 دسمبر 2005–2 جولا‎ئی 2021) رینا دتہ (18 اپریل 1986–دسمبر 2002)
ٻال	ایرا خان ،  جنید خان ،  آزاد راؤ خان
ٻال	3
پیو	طاہر حسین
بھیݨ بھرا	فیصل خان ،  نکھت خان
عملی زندگی
مادر علمی	بمبئی اسکاٹش اسکول
کم	فلم اداکار ،  فلم ہدایت کار ،  فلم ساز ،  منظر نویس ،  ٹیلی ویژن میزبان ،  پروڈوسر
پیشہ ورانہ زبان	ہندی ،  اردو ،  انگریزی
مؤثر	بھیم راؤ رام جی امبیڈکر
اعزازات
پدم بھوشن   (2010) سی این این نیوز 18 انڈین آف دی ائیر (2008) فلم فیئر اعزاز برائے بہترین ہدایت کار (برائے:تارے زمیں پر ) (2008)  فنون میں پدم شری   (2003)
	IMDB پر صفحات

عامر خان (تلفظ: [ˈaːmɪr xaːn]؛ ڄَمݨ دی تریخ: 14 مارچ 1965ء) ہک بھارتی اداکار، فلمساز اتے مصنف ہن۔ ہندی فلماں وچ 30 سال توں ودھ دے سفر دے دوران، خان نے اپݨے آپ کوں ہندوستانی سنیما دے سب توں مشہور اتے با اثر اداکار دے طور تے قائم کیتا۔عالمی سطح تے انہاں دے چاہوݨ آلیاں دی تعداد ٻہوں ودھ ہے، خاص طور تے بھارت اتے چین وچ اتے نیوز ویک نے انہاں کوں دنیا دا سب توں وݙا فلمی ستارہ (the biggest movie star) قرار ݙتا ہے۔ ایہہ 14 مارچ، 1965ء کوں طاہر حسین دے گھر پیدا تھئے۔ 1973ء وچ اپݨے چاچے ناصر حسین دی فلم یادوں کی بارات وچ ٻال فنکار دے طور تے پہلی واری سکرین تے نظر آئے۔ یارہ سال بعد فلم "ہولی" وچ کم کیتا مگر انہاں کوں فلمی دنیا وچ کامیابی اتے پزیرائی انہاں دے چاچے دے پُتر منصور خان دی فلم قیامت سے قیامت تک توں ملی جیہڑی 1988ء وچ جاری تھئی۔ ایں فلم وچ انہاں کوں بہترین ڈیبیو اداکار دا فلم فیئر ایوارڈ ملیا۔ 90 دی ݙہاکے وچ انہاں دیاں کئی مشہور فلماں ریلیز تھیاں جِنہاں وچ راجا ہندوستانی، سرفروش، بازی اتے عشق وغیرہ شامل ہن۔ 2000ء دے بعد انہاں دی اداکاری وچ ہک ٻہوں وݙی تبدیلی واقع تھئی۔ جݙاں انہاں لگان فلم وچ کم کیتا۔ لگان فلم کوں آسکر کیتے وی نامزد کیتا ڳیا۔ لگان دے بعد انہاں کئی سپر ہٹ فلماں وچ کم کیتا جِنہاں کوں بین الاقوامی سطح تے پزیرائی ملی انہاں فلماں وچ منگل پانڈے، تارے زمین پر، گجنی، تھری ایڈیٹس وغیرہ شامل ہن۔ عامر خان نے انہاں فلماں وچ حقیقی زندگی دیاں تصویراں پیش کرݨ دی کوشش کیتی۔ خاص طور تے تارے زمین پر اتے تھری ایڈیٹس تدریسی نظام وچ موجود خرابیاں دی نشاندہی دے حوالے نال بہترین فلماں تصور کیتیاں ویندن۔ انہاں دیاں فلماں عام اتے کمرشل موضوعات توں ہٹ کے ہوندن۔

خاندانی پس منظر

عامر خان باندرہ، ممبئی دے ہک مسلمان پٹھان نورزئی ٹٻر وچ پیدا تھئے۔ انہاں دا ٹٻر شروع توں ہی فلمی دنیا نال جُڑیا ہویا ہئی۔ انہاں دے پیو طاہر حسین ہک فلمساز اتے ہدایت کار ہن۔ انہاں دے چاچے ناصر حسین وی ایں میدان نال وابستہ ہن۔

ذاتی زندگی

80 دی ݙہاکے دے آخر وچ عامر خان نے رینا دت نال شادی کیتی۔ مگر ہک غیر مسلم کوں انہاں دے ٹٻر نے بطور نونھ قبول کرݨ توں انکار کر ݙتا۔ ایں طرحاں شروع وچ انہاں دی اے شادی لُکی رہی۔ رینا توں عامر خان دے ݙو ٻال ہن ہک پُتر اتے ہک دھی۔ سنہ 2002ء وچ عامر خان اتے رینا دے درمیان طلاق تھی ڳئی۔ 2005ء وچ عامر خان نے کرن راؤ نال شادی کیتی جیہڑی بطور اسسٹنٹ ڈائریکٹر لگان وچ کم کر چکی ہئی۔ جولائی 2021ء وچ کئی اخباراں نے خبراں شائع کیتیاں ہن جو عامر خان اتے کرن راؤ نے ہک ٻئے توں جدا تھیوݨ دا اعلان کر ݙتا ہے اتے اپݨے پُتر دی پرورش رَل تے کریسن۔ عامر خان ودھ تر اپݨیاں فلماں تے توجہ ݙیوݨ کیتے مشہور ہن۔ ایں کیتے اوہ ودھ تر اشتہارات اتے ایوارڈ شوز وچ نظر نہیں آندے۔

مقبولیت

2013ء وچ انہاں دی فلم دھوم 3 نے انہاں کوں ٻہوں ودھ مقبولیت ݙتی۔ دھوم 3 نے بالی ووڈ دیاں ساریاں فلماں دے ریکارڈ توڑ ݙتے اتے بالی ووڈ دی سب توں ودھ بزنس کرݨ آلی فلم بݨ ڳئی۔ ایں فلم وچ عامر خان بطور چور دے نظر آئے، ایں فلم وچ عامر خان ڈبل شاٹ ہوندن، فلم وچ ہک ڳاݨاں وی تیار کیتا ڳیا، جیندے تے تقریباً 5 کروڑ لاگت آئی۔ ایں ڳاݨے دا ناں ملنگ ملنگ ہئی۔ اے ڳاݨاں بالی ووڈ دا سب توں مہانڳا ڳاݨاں ریکارڈ تھیا۔

2014ء وچ دسمبر دے آخر تے انہاں ہک ٻئی فلم بݨائی، جیندا ناں پی کے ہئی، پی کے فلم وچ عامر خان کوں ٻہوں اوکھا دا سامݨا کرݨا پیا، پی کے فلم نے عامر خان دی ہی بݨائی ہوئی فلم دھوم 3 دا ریکارڈ توڑ ݙتا اتے بالی ووڈ دی سب توں ودھ بزنس کرݨ آلی فلم بݨ ڳئی۔ ایں فلم تے کیس وی تھیا کیوں جو اے ہندو مذہب دے ٻہوں خلاف ہئی، مگر ایں فلم دا مقصد ذات پات اتے مذہب توں پاک انسان کوں ݙکھاوݨ ہئی، بہرحال کیس دا اے فیصلہ تھیا جیں اے فلم ݙیکھݨی ہے او ݙیکھے جیں نہیں ݙیکھݨی او نہ ݙیکھے، ایں فلم دا پہلا پوسٹر رد کر ݙتا ڳیا ہئی کیوں جو ایں وچ عامر خان ننگے کھڑے ہن اتے نال انہاں دے کول ہک ٹیپ ریکارڈر ہئی جینکوں اوہ ݙوہاں ہتھاں نال ایں طرحاں پکڑیا ہویا ہئی جینکوں ݙیکھ تے اے نہیں آکھیا ونڄ سڳدا ہئی جو اوہ واقعی ننگے ہن۔ فلم، پی کے 2014ء - 2015ء دی کامیاب فلم ہے۔ ایں فلم وچ عامر خان دا کردار ہک ایلین دا ہے جیہڑا ٻئی دنیا توں اتھاں آندے، مگر ایندا سپیس شپ واپس چلا ویندے۔ عامر خان پی کے فلم دی وجہ توں عوام وچ ٻہوں ودھ مقبول تھئے۔

تنقید

23 نومبر 2015ء کوں نویں دہلی وچ ہک انعام ونڈݨ دے جلسے وچ عامر خان نے "ودھدی ہوئی عدم رواداری" دا ذکر کیتا اتے آکھیا جو انہاں ایں دا احساس پچھلے چھی توں اٹھ مہینے وچ اے ودھ محسوس کیتا۔ انہاں اتھوں تائیں آکھیا جو انہاں دی تریمیت کرن راؤ نے مُلک چھوڑݨ دا وی مشورہ ݙے ݙتا ہئی۔ البتہ انہاں آکھیا جو اوہ اتے انہاں دی تریمیت بھارت کوں ٻہوں چاہندن اتے مُلک چھوڑݨ دا کوئی ارادہ نہیں رکھدے۔

تھپ مارݨ دی کم

بھارت دی ہک سیاسی جماعت شیو سینا جیہڑی مہاراشٹر وچ بر سر اقتدار اتحاد دا حصہ ہے، ایں بیان تے سخت اعتراض ظاہر کیتا اتے احتجاج کیتا۔ ایندی لدھیانہ اکائی نے عامر خان کوں چپیڑ مارݨ آلے کہیں وی شخص کوں ہک لکھ روپے دے انعام دا اعلان کیتا۔ بھانویں جو مہاراشٹرائی قائدین نے ایں پیشکش توں اپݨے آپ کوں انج کر ڳھدا، ول وی لدھیانوی شاخ دے قائدین کوں نہ تاں پارٹی توں کڈھیا ڳیا اتے نہ کوئی صفائی طلب کرݨ یا تادیبی کارروائی دی پہل کرݨ دی کوئی کوشش کیتی ڳئی۔

آن لائن تھپ مارݨ د ی مہم

شیو سینا دے قائدین دے چپیڑ مارݨ دی دعوت تے ریاستہائے متحدہ امریکا دے میامی ایڈ اسکول دے ہیمانیش آشار اتے دھُوَنی شاہ نے ہک ویب گاہ بݨائی جتھاں تے لوک اپݨی نفرت دے اظہار یا تفریح کیتے عامر خان کوں آن لائن چپیڑ مار سڳدن۔

فلماں

کجھ مشہور فلمیں

• قیامت سے قیامت تک
• جو جیتا وہی سکندر
• انداز اپنا اپنا
• میلہ
• سرفروش
• لگان
• تارے زمین پر
• رنگ دے بسنتی
• گجنی
• تھری ایڈیٹس
• تلاش
• دھوم 3
• پی کے
• دنگل

بیرونی روابط

• آفیشل سائیٹ
• عامر خان فلمی انٹرنیٹ ڈیٹا بیس پر