عالیہ انمول
اصل ناں عالیہ عزیز
قلمی ناں عالیہ انمولؔ
جٖمنْ 1970 ء
تعلیم مڈل
پیشہ گھریلو خاتون
فون نمبر 0304 9100812
جاہ پتہ محلہ شاہین آباد پرانْاں بٖدھلہ روڈ ملتان
شعری مجموعہ ’’سُنْ سینگی ‘‘ دی شاعرہ عالیہ انمولؔ دا ایہ چوتھا شعری مجموعہ ہے۔انمول خوبصورت لبٖ ولہجے دی شاعرہ ہے،اپنْی شاعری وچ ٹھیٹھ سرائیکی زبان استعمال کریندی ہے۔سرائیکی شاعری دیاں تقریبََا ساریاں صنفاں لکھدی ہے۔انمولؔ دی شاعری دا موضوع وسیب دیاں محرومیاں تے غربت و افلاس ہے۔خصوصََا اوہ صنفِ نازک یعنی عورت ذات دی حقیقی ترجمان ہے۔تے صنفِ نازک دے مسائل اوہ شدّت نال محسوس کریندی ہے۔جیویں جو آہدی ہے۔
؎دھی دا بار اٹھاونْ کیتے گھر دے دانْے ویچنْے پوسن
بہر حال انمول دی شاعری محبت تے خلو ص دی شاعری ہے۔جیندے وچ انہاں دی خلوص پرور شخصیت دا عکس نمایاں نظر آندے۔نمونہ کلام حاضر ہے۔
(1)غزل
[لکھو | ماخذ وچ تبدیلی کرو]دل دیاں گٖالھیں حال اولّے
بٖہہ تے ونڈوں ککراں تلّے
گزرا ویلا ہتھ نہ آوے
رول کھڑی میں سینگی چھلّے
ماء ہئی میکوں متّاں ڈٖیندی
میں نہ ہک وی بٖدھی پلّے
طعنے روز شریک مریندے
کم جو کیتم ڈھیر کُلَلّے
جو گزرے انمولؔ گزاروں
بھانویں مندڑے بھانویں بھلّے
(2)غزل
[لکھو | ماخذ وچ تبدیلی کرو]رُل گٖئے میڈٖے خواب نی امڑی
جندڑی وانگ عذاب نی امڑی
نانگاں کھادی پیار جو کیتم
کیتا پیار خراب نی امڑی
گھر دی رہی نہ ور دی رہ گٖئی
رہندی جند بے تاب نی امڑی
سسی بنْ کے روز سوچیندی
ڈٖے گٖئے ہوت جواب نی امڑی
سر دا سئیں انمول ؔجو ہائی
اوندا ذکر ثواب نی امڑی
؎ماء انمولؔ کوں متّاں ڈٖے کے
ول ول تھیوے صدقے گھولے
٭٭٭