عاصم ثقلین درانی

ڄمݨاں:30اکتوبر1970ء

عاصم ثقلین درانی احمد پور شرقیہ اِچ پیدا تھئے ۔ اُردو زبان و ادب دے اُستاد ہِن ۔ ایس ای کالج بہاول پور اِچ پڑھیندن۔ اُردو اِچ ٻہوں سوہݨی شاعری کریندن۔ کہیں کہیں ویلے سرائیکی غزل وی لکھ گھندن۔

ونڄائے حیاتی دا پل پل میں چپ اِچ تے چُپ اِچ حیاتی ونڄاوݨ دا ݙکھ اے

ذرا حوصلہ کرکے تیکوں ݙسیساں ، جیڑھا تیکوں کجھ نہ ݙساوݨ دا ݙکھ اے

میں تقسیم کرتے گھٹاوݨ ڳیا ہم تے ݙوں نال ݙکھ کوں ضرب ݙے کے آیاں

جیڑھے یار ݙکھ نی ونڈیا میݙا ، ہُݨ اونکوں اپݨا ݙکھڑا سُݨاوݨ دا ݙکھ اے

نہ کھٹسی نہ لاہسی توں او بار چا تے ، سوہݨا دِل اُتے عشق دا وار چاتی

ایہ ݙوں چار ہنجویں دی کوئی کھیݙ کائنی ایہ ساری حیاتی ہنڈاوݨ دا ݙکھ اے

میں ہر ہنج اِچ تیݙی اُلفت ڳولینداں سبھے سُول صدمے تیݙے نانویں لینداں

ذرا انج انج کرتے میکوں ݙسا ونڄ جوکیا کیا تیݙے ذمے لاوݨ دا ݙکھ اے

جیکر من تے آئے ڄݨوا ڳئے اپݨا منیوا ، تے منیا نی میݙی محبت

اوں ایجھاں میکوں بے بھرم آن کیتے ، جو ثقلین اونکوں مناوݨ دا ݙکھ اے

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان