عاشق رسول اشک

اصل ناں    عاشق رسول

تخلص       اشکؔ

جٖمنْ        1949ء

جاہ پتہ      وستی کمال پور ۔خانگڑ ھ ضلع مظفر گٖڑھ

غزل

ڈٖیکھ کے حالت میڈٖی اپنْاں اسیر آکھی گٖیا

بے تکلف باد شاہ میکوں فقیر آکھی گٖیا

توں ضرورت ہیں میڈٖی ایں زندگی دے حسن دی

خون تھئے دل کوں ولا نظریں دا تیر آکھی گٖیا

ساہ نساہ ننگا بدن ہے بوچھنْی بے اوچھنْی

قرض دا ورثہ میڈٖی کفنی دی لیر آکھی گٖیا

سجھ دے اُبھرنْ دے پچھو ڈھلدے پچھانویں ڈٖیکھ تے

وقت ہک ہک ساہ کوں منکر ، نکیر آکھی گٖیا

اشکؔ ڈٖکھ بٖوٹی دا پھُل ہر ہک ڈٖکھی دل دی دوا

سانونْی اکھ دی پھلی پپلی کوں نیر آکھی گٖیا

؎میں تھبٖاکے مار کے تردا ریہاں چھولیں دیوچ

من ڈوٖہیں کھلدے ریہے میڈٖے نکمیں بٖانْ تے

میں نوایا سر جڈٖاں اپنْی وضع داری پچھوں

یار خنجر رکھ ڈٖتا حسن و ادا دے مانْ تے

٭٭٭