عارف بلوچ

اصل ناں       محمد عارف

قلمی ناں       عارفؔ بلوچ

جٖمنْ           1984ء

تعلیم          ایم اے (اردو) بی ایڈ

پیشہ           تدریس

فون نمبر        0300 5812618

جاہ پتہ         موضع کوٹلہ دائے قبول تحصیل و ضلع رحیم یار خان

؎بے عیبایار چہندیں تاں فرشتیں نال یاری لا

میں ہاں اولاد آدم دی خطا میڈٖی وراثت ہے

ایں شعر توں معلوم تھیندے جو عارفؔ بلوچ دا محبوب بٖہوں نخریلا ہے ۔لیکن محبوب دے نخرے تاں سہنْے پوندن۔ عاشق کوں نہیں ٹھہندا جو اوہ بے نیاز تھی کے محبوب کوں آکھے جو توں کہیں بٖئے نال یاری ونجٖ لا ۔ خواہ اوہ فرشتے ای کیوں نہ ہوون ۔ بہر حال عارف بلوچ ضلع رحیم یار خان دا نمائندہ شاعر ہے ’’ولیکھا‘‘ دے ناں نال آپ دا ہک شعری مجموعہ وی چھپ چکے ۔ڈٖوجھیاں صنفاں دے نال نال غزل بٖہوں سوہنْی لکھدے۔ نمونہ کلام پیشِ خدمت ہے۔

(1)غزل

بٖاہروں چٹّے کھیر نظردن اندروں کالے کالے لوک

من کوں میلا کیتی ودن کالی نیت والے لوک

منزل اُتے پُجٖنْاں ہئی تاں ہولے ہولے پیر ودھا

بٖہوں نقصان اُٹھیندن جیویں اکثر ڈھیر اُبٖالھے  لوک

کہیں جاہ تے زردار دے کُتّے مکھنْ کھیر تے پلدے پئے ہن

کہیں جاہ کرن روٹی کیتے اتھاں ڈھیر کشالے لوک

اپنْی میں کوں مار تے جیویں خان دی تابعداریں کرن

او انسان حیوان برابر میکوں لگٖدن گٖالھے لوک

عارف ساڈٖی کنڈ تے چھاپئے خان دے تلّھڑ صاف نظردن

تن من زخمی زخمی تھی گٖئے اندر چھالے چھالے لوک

(2)غزل

جڈٖاں دا چھوڑ گٖئیں میکوں میڈٖا دلدار جند مانْیں

ودا مر مر کے جیندا ہاں توں کر عتبار جند مانْیں

تیڈٖیں ہوندیں ہزاراں مانْ ہن میکوں میڈٖا دلبر

تیڈٖے بٖاجھوں میکوں لگٖدے میں ہاں بے کار جند مانْیں

تیکوں ڈٖیکھنْ دے کیتے میں ودا در در تے رلدا ہاں

میڈٖیں سکدیں اکھیں کوں ہُنْ کرا دیدار جند مانْیں

توں میڈٖا تھی یا غیراں دا اے مرضی ہے تیڈٖی دلبر

میں تاں مردیں تلک تیکوں ہے کرنْاں پیار جند مانْیں

تیڈٖے میں ہک اشارے تے اے دنیا چھوڑ ڈٖیندا سئیں

میکوں ازما تے ڈٖیکھیں ہا چھڑا ہک وار جند مانْیں

ملئے عارفؔ ٹٹارے ہن میکوں غم دے سمندر وچ

میڈٖے غم ہن ودھارے وچ میڈٖا غمخوار جند مانْیں

٭٭٭