عادل ملاݨہ
عادل ملاݨہ سرائیکی شاعر ہے۔ کوٹ ادو نال تعلق ہے۔
نشتر یونیورسٹی ملتان توں ایم بی بی ایس کیتے۔
اصل ناں محمد عادل
قلمی ناں عادل ملاݨہ
جٖمنْ 1998ء
تعلیم ایم بی بی ایس
پیشہ ڈاکٹر
فون نمبر 0309 6205014
جاہ پتہ چکنمبر564تحصیل چوک سرور شہید ضلع مظفر گٖڑھ
نمونہ کلام
[لکھو | ماخذ وچ تبدیلی کرو]غزلیہ اشعار
[لکھو | ماخذ وچ تبدیلی کرو]؎شباب دیوچ ٻلکّی دو ول ونڄݨ دی خواہش
ٻلکّی دیوچ اے سک ہئی پہنچوں شباب توݨیں
سوال سوچاں دے نال چیتے کھپائی ودے ہن
سوال تاں ٻس سوال ہوندن ،جواب توݨیں
اجٖاں تاں عادلؔ ایں شوق دے راہ دی ابتداء ہے
سلام کنڈیاں کوں نال کرنْے گلاب توݨیں
؎تیݙی سک توں ڈھیر اساکوں رزق دے رولیں کھاہدے
تہوں تاں اساں رہندے ہسے راتیں ݙینہاں نکھتے
میکوں پلّے پیسے ہوونْ دا ہک فائدہ ملئے
جیندے نال الایا میں ، او میݙا سونہاں نکھتے
غزل
[لکھو | ماخذ وچ تبدیلی کرو]شام تھیوے ہا وسبہ سارا کٹھا ہوندا ہا
وستی دے سردار دے کولوں واجا ہوندا ہا
حق ہمسائیں دی خیر خبر وی تھیندی رہندی ہئی
کچّے کوٹھیں دے وچ ہک ݙُو جالا ہوندا ہا
جتّھاں دریا واہندا پیائے ،ٹِبّے ہوندے ہن
جتّھاں ٹِبّے ݙسدن اتھاں دریا ہوندا ہا
اساں پوری پُچھ ݙس کرکے دھرتی اُتّے آئے ہیں
ساکیں پہلے ساݙا اتھاں ݙاݙا ہوندا ہا
تیݙے ݙکھاں دل بدھوائ اے جیندے پئے ہیں نتاں
ساݙے کیتے جیوݨ کݙاں سؤکھا ہوندا ہا؟
~محمد عادل ملانہ
ݙو شعر
[لکھو | ماخذ وچ تبدیلی کرو]اپݨے ہووݨ دی گول وچ ہاں میں
پتّے کیجھیں ماحول وچ ہاں میں
میݙی جھمر دے پھیر وچ ہیں توں
تیݙی کافی دے بول وچ ہاں میں
~عادل ملانہ
ساہ دے گُھمّر گھیر اچ گُھمدیں ،یار حیاتی گھٹی
ݙوݙا ݙوݙا چکھدئیں چکھدئیں نوں مݨ ماکھی گھٹی
ݙکھ آیائے تاں وقت وی قطری مَٹھئیں ٹرݨ پئے گے
سُکھ دے وچ تاں زندگی ساری وݙی جلدی گھٹی
عشق اے، سچے جذبیں سُودھا پورا بندہ منگدے
اتھاں وارے کینی کھاندی کوئ شئے ودھی گھٹی
اوویں تاں ہݨ بندہ بندہ کلھا تھیندا ویندے
اوویں تاں مخلوق خدا دی اصلوں کینی گھٹی
~عادل ملانہ
نعت رسول مقبول ص
[لکھو | ماخذ وچ تبدیلی کرو]انسان دا وس نئیں جو کُوئ وصف ݙساوے
اللہ ای تیݙی نعت سُݨاوے تاں سُݨاوے
الحمد توں والناس تائیں سارے دا سارا
قرآن تیݙی ذات دا سہرا نظر آوے
اللہ نیں جو آکھیئے "ﻭَﺭَﻓَﻌْﻨَﺎﻟَﮏَ ﺫِﮐْﺮَﮎْ"
منکر ہے جیڑھا کیویں تیݙا ذکر گھٹاوے؟
پیغام تیݙا "وحیٌ یُّوحیٰ" دے مطابق
یعنی توں الاویں تاں خدا آپ الاوے
عادل جھئیں نکمے دے پلے کجھ وی تاں کینی
ہک جان ہے لکھ واری تیݙی ویل وتاوے
شاعر : عادل ملانہ
اپݨی جاہ تے اپݨیں رنگ اچ جیوݨ جیندے پئے ہیں
تُساں پُھل غلاب دے ماہی، اَساں اَک دے ݙوݙے
آمھوں سامھوں بیٹھیں دیداں ول ول مِلدیاں ریہاں
اُٹھ دے نال کچاوے اُتّے دل وی کھادھے لوݙے
کے تائیں اوندے پاسوں ایویں ولدی کینہ آسی
کے تائیں اساں رگڑی راہسوں متّھے، گِٹّے، گوݙے
جیڑھی ریت تے اساں تُساں جُھمّر کھیݙدے ہاسے
اوکوں ہُݨ لتاڑی ویندن عربی جڑے توݙے
اساں عادل بھوئیں اپݨی دے وݨ نہ مُول مریسوں
کاٹھیاں چݨدے راہسوں توڑے، بالی راہسوں چھوݙے
~محمد عادل ملانہ