ظہور دھریجہ ڄم پل

عیسوی کیلنڈر مطابق پہلی جنوری 1960 ءظہور دھریجہ دی ڄمݨ دی تاریخ ءِ، دیسی تے اسلامی تاریخ دا پتہ کائنی، شیت ایندی وجہ ایہہ ہوسی جو انگریز دور توں ہُݨ تک انگریزی کیلنڈر چلدا پے ، میں توں وݙی میݙی ہک بھیݨ ہئی جیندا ناں حنیف مائی ہا ،میں توں ݙوترائے سال او پہلے ڄئی ہوسے ایں حساب نال اَݨاں ٹِکاݨاں لاتا ونڄے تاں میݙے ابے سئیں دی شادی 1955ء دے لڳ بھڳ تھی ہوسے ۔ میݙے ڄمݨ دے سال ݙٖݙھ سال بعد میݙی بھیݨ پیدا تھی جیندا ناں لطیف ہے ،ماشاء اللہ اُو ہُݨ وی حال حیات ہے ، میݙی اماں دی وفات میݙی بھیݨ لطیف دے ڄمݨے تے تھی ہئی یعنی اماں سیݨ وِیم ویلے فوت تھی ڳے ہن ۔میݙی عمر اُوں ویلے سال ݙݙھ سال ہوسے ،میکوں اماں دی شکل یاد کائنی،صدمے دی وی سُدھ نہ ہئی جو سال ݙݙھ سال دے ٻال کوں کہیں شئے دا پتہ نی ہوندا ۔اغوں مغوں ،بانبڑے کھاوݨ تے کھٹ کوں پکڑ تے پیر تے پیر چاوݨ دے بعد ٻال کوں ہولے ہولے کجھ شئیں دی سمجھ آنوݨ پمدی اے ،یتیمی دا صدمہ پہاڑ توں ودھ ہوندے ،خاص طور تے ماء دا پیار ٻئی جھاہ توں نی مل سڳدا، پر نظام قدرت ایویں ہے جو یتیم نال ہر کئی ہمدردی کریندے اونکوں ہر پاسوں پیار ملݨ پے ویندے ، پتھر دل انسان وی یتیم دے سر تے ہتھ رکھیندے ، میکوں ہوں ویلے پتہ لڳا جݙاں لوک میکوں یتیم سمجھ تے پیار کریندے ہن تے اکھیندے وی ہن جو ایندی ماء مر ڳی اے ۔

ٻلپݨ:

میݙ ی چار پنج سال عمر ہوسے ،نِکی بھیݨ لطیف میں کنوں سال ݙڈھ سال چھوٹی ہئی تے وݙی حنیف ݙو ڈھائی سال وݙی ہئی ،اساݙی وݙی بھیݨ اساکوں  کھیݙیندی ہئی ، پیر نال مٹی دے گھر بݨاوݨ ، مٹی دا گارا بݨا تے مٹی دے تھاں بݨاوݨ تے نال نال تھِگڑیں نال گُݙی گُݙا بݨا تے ساکوں ݙیندی ہئی ، میݙی بھیݨ گُݙی کوں گھن تے ہاں نال لیندی ہئی ،اونکوں پیار کریندی ہئی ، اُوندے نال ڳالھیں کریندی ہئی تے آکھدی ہئی تیکوں مانی کھواواں ،پاݨی پِلاواں ۔ کھیݙ کھیݙ اِچ گُݙی گݙے دی شادی وی تھیندی ہئی تے چاول وی کُوڑی مچی دے پکدے ہن ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان