ظفر جتوئی

اصل ناں      ظفر عباس خان

قلمی ناں       ظفر جتوئی  

جمن           1963ء  

تعلیم          میٹرک، عربی فاضل

پیشہ           زراعت 

فون نمبر        03344400514

جاہ پتہ         جتوئی والا تحصیل کوٹ چھُٹہ ضلع ڈیرہ غازی خان

ظفر جتوئی دی تعلیمی قابلیت انہاندے کوائف اچ ڈسائی گئی ہے ۔جتھوں تک آپ دی شاعری دا تعلق ہے تاں اوہ معاشرے دے نبض شناس شاعر ہن ،اوہ اپنے شعراں دے ذریعے بے راہ روی دا شکار خصوصاََ نو جوان طبقے دی ہر ممکن اصلاح کرن دی کوشش کریندن۔تے لوکاں دا شعور بیدار کریندن۔آپ دا مشاہدہ بہوں تیز ہے ، لوکاں دی نفسیات کوں جلدی نال سمجھ ویندن۔تہوں انہاں دے ہر شعر وچ کوئی نہ کوئی مت دی گالھ ہوندی ہے ۔ہر شعر وچ کوئی نہ کوئی مقصدیت ہوندی ہے ،بے مقصد خانہ پوری دا کوئی شعر موزوں نہیں کریندے۔سٹیج تے آون تاں سامعین پُر جوش تاڑیاں نال انہاں دا استقبال کریندن، تے ول فرمائشاں دی بھر مار اتنی تھی ویندی ہے جو جتوئی صاحب کوں ہتھ بدھ کے جی چھُڑواناں پوندے۔ورنہ سامعین انہاں کوں سٹیج توں تلے نہیں آون ڈیندے۔

(1)غزل

اوکوں آکھومیڈی بے انت چپ دا کئی صِلا ڈیوے

جیویں ڈکھ دان کیتے ہِس اوئیں کجھ حوصلا ڈیوے

جے منگدے تاں عطا اوندی جگارے ہن ولا ڈینداں

اساں کجھ وی نسے منگدے ،ساڈیاں نندراں ولا ڈیوے

دعاء منگدا وداں مولا ایجھاں مخلص ملاویں ہا

جیڑھا ثالث بنے ساڈا، اساکوں چن منا ڈیوے

جیویں نازک حنائی ہتھ توں میڈا نانواں مٹایا ہِس

اوئیں مختار ہے ساری میڈی ہستی مٹا ڈیوے

کلھیپا ہک وڈیپا ہے،ظفر خالق کوں ڈیکھو چا

کلھیپا کئی سزا کائنی، میکوں کئی بئی سزا ڈیوے

(2) غزل

پئے گئے پیار دا کال وے لوکو پیار کرو

ایں تاں نا ہن حال وے لوکو پیار کرو

پیار کریسو دہشت گردی مِٹ ویسی

بچ ویسن اے لال وے لوکو پیار کرو

نفرت نال تاں جیون اوکھا تھی ویندے

ڈینہ بن ویندن سال وے لوکو پیار کرو

نفرت مند ہا جئیں وی ایٹم بم جوڑیئے

نفرت نفرت نال وے لوکو پیار کرو

ظفر ؔ میں سائل ہاں ساری دنیا دا

ہک ہے صرف سوال وے لوکو پیار کرو

____________________

او وی بیا ہے جیندے نانویں شعر لکھینداں

او وی جیکوں پیار کریندے او کئی بیا ہے